Espoza Prezidente Repúblika, Cidália Nobre Mouzinho Guterres, entrega sasán nesesidade bázika ba vítima inséndiu iha eis Merkadu Comoro. Imajen TATOLI/Cipriano Colo

DILI, 14 dezembru 2019 (TATOLI)–Vítima inséndiu iha eis merkadu Comoro, Aldeia 03, Suku Fatuhada, Munisípiu Dili, agradese ba Prezidénsia Repúblika ne’ebé oferese sasán nesesidade bázika atubele hakmaan sofrimentu ne’ebé vítima sira enfrenta. 

Reprezentante vítima, Anselmo Gusmão (52), agdarese tanba Espoza Prezidente Repúblika, Cidália Nobre Mouzinho Guterres hamutuk ho Xefe Kaza Sivíl Prezidénsia Repúblika, Francisco Maria de Vasconcelos bele hakat to’o iha vítima sira-nia fatin, hodi haree rasik situasaun ne’ebé vítima sira enfrenta.

Aleinde ne’e, Anselmo agradese tanba Prezidénsia Repúblika la taka matan hodi oferese mós sasán hirak-ne’e, tanba to’o oras ne’e família lubuk ida mak falta hahán no mós sasán nesesidade bázika ahi han hotu.

“Ami labele esplika, maibé ita-boot sira haree rasik ami-nia situasaun. Dezastre ne’e ita la espera, maibé família barak agora ami la hatene tuir sira han ka lae, sira hela iha ne’ebé mós ami la hatene tanba buat hotu ahi han hotu”, Anselmo relata iha fatin akontesimentu, ohin.

Reprezentante vítima ne’e mós husu ba parte Prezidénsia Repúblika atu oinsá ko’alia ho Governu, nune’e bele fó apoiu ba maluk sira ne’ebé lakon uma, no buat hotu, oras ne’e laiha kbiit atu hola kalén no materiál sira seluk hodi konstrui hikas uma.

Nia mós submete kedas lista estudante sira husi ensinu báziku to’o universidade hamutuk na’in 26 ne’ebé lakon sira-nia dokumentu importante hanesan kaderneta, sertifikadu no diploma sira iha momentu ahi han uma, husu atu autoridade lokál atende estudante hirak-ne’e hodi halo rekomendasaun ruma, nune’e labele prejudika sira-nia estudu.

“Ami iha ne’e, agora tempu udan, labarik ki’ik-oan barak, sira balun hela de’it iha lona okos no foin lalais barak mak moras diareia. Ami husu atu parte kompetente bele fó hela asisténsia ba kestaun ne’e”, Anselmo husu.

Lee mós: Ahi Han Kioske 100-resin iha Antiga Merkadu Comoro

Iha fatin hanesan, Xefe Suku Fatuhada, Marcelino Soares, hanesan autoridade lokál agradese ba apoiu husi Prezidénsia Repúblika tanba vítima sira presiza duni tulun husi parte hotu.

Xefe suku ne’e mós louva inisiativa vítima ne’ebé haka’as an ho kbiit rasik hodi konstrui hela fatin perante situasaun ne’e.

“Ha’u louva ita-boot sira tanba iha inisiativa rasik hodi harii rasik imi-nia uma. Ita presiza mak ida-ne’e duni, no labele hein. Ita bele husu ba Estadu atu tau-matan hodi ajuda ita, maibé ita mós tenke iha inisiativa atu responsabiliza ita-nia moris rasik. Ha’u prontu oras 24 nia laran atu trata imi-nia dokumentu sira ne’ebé lakon”, Marcelino tenik.

Entretantu, Xefe Kaza Sivíl Prezidénsia Repúblika, Francisco Maria de Vasconcelos iha serimónia entrega materiál ne’e hateten Prezidénte Repúblika hanesan Xefe Estadu hakarak espresa solidariedade no domin ba vítima inséndiu.

“Apoiu ne’e dalaruma ki’ik liu, tanba ne’e husu atu labele haree ba sasán nia kuantidade maibé haree ba Prezidente nia domin no solidariedade ba sidadaun hotu”, nia haklaken.

Xefe Kaza Sivíl mós fiar katak xefe suku ne’ebe besik liu vítima sira sei atende hodi rezolve dokumentu importante ne’ebé lakon.

“Maski Prezidente Repúblika la’ós ezekutivu, maibé Prezidente mós odamatan nakloke atu atende ita-boot sira, hodi ko’alia ho Governu atubele buka meiu oinsá maka kria kondisaun ida-ne’ebé di’ak tuir prinsípiu ema moris nian”, nia subliña.

Nune’e mós, Espoza Prezidente Repúblika, Cidália Nobre Mouzinho Guterres sente triste ho situasaun ne’e tanba família barak mak hela iha lona okos, maski ema hotu la espera ho dezastre ne’e bele mosu.

“Imi triste, ha’u mós triste, tanba uma hanesan fatin importante atu ita bele horik ba. Tanba ne’e, ha’u enkoraja autoridade lokál atu serbisu hamutuk ho vítima sira nune’e buka dalan atubele rezolve kazu sériu ne’e”, nia enkoraja.

Sasán nesesidade bázika ne’ebé oferese husi Prezidénsia Repúblika mak hanesan bikan, kopu, sanan, tasu, tirina etu, kanuru ki’ik, kanuru boot, tirina modo, balde, sakola, sabaun, pastadente, gayung, toalla, fós, mina, biti no manta.

Inséndiu ne’ebé akontese iha loron 9 dezembru tinan ne’e, iha uma hamutuk 91 mak ahi han mutuk.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here