Estudante finalista UNPAZ balun haksolok hamutuk ho família, belun no kolega sira bainhira simu diploma, nu´udar rezultadu finál durante partisipa iha atividade letiva iha banku universidade. Imajen: Nelia Fernandes

DILI, 14 dezembru 2019 (TATOLI)-Universidade da Paz (UNPAZ), liuhusi Fakuldade Direitu, ohin, fó judisium ba estudante finalista na’in 163, kompostu husi mane 112 no feto 51.

Tuir Magnifiku Reitór UNPAZ, Adolmando Soares Amaral espera ho atividade judisium ba estudante finalista na´in 163 ne´e UNPAZ komesa sai daudauk ona no sei semo aas no sei aas ba beibeik.

“Universidade da Paz hanesan ai-fuan ida, ne’ebé ema hotu hakarak atu mai konsume ai-fuan ne’e tanba ai-fuan ne’e ninia midar, halo ema hotu sei mai hobur,” kompara Reitór Adolmando Soares Amaral bainhira hato’o lia-menon iha ámbito judisium ba dala-XIII, ho tema Desperte Á Lei e Dorme a Injustçia”, iha salaun Kampus UNPAZ, ohin.

Akadémiku UNPAZ ne´e espera mós “matak malirin” ba estrutura foun UNPAZ nian, liuhusi estudante no inan-aman sira-nia orasaun.

“Sira ne’ebé reza fó matak malirin ba estrutura foun, hamutuk ho inan-aman sira ne’ebé kontinua fiar hodi halo investimentu ba universidade da Paz hamutuk ho Fundasaun Neon Metin mak Universidade da Paz iha futuru sei semo aas no sei aas ba bebeik”.

Reitór UNPAZ, Adolmando Soares Amaral hateten, depois saudozu Profesór Doutór Lucas da Costa la iha, públiku dúvida ho UNPAZ tanba bainbain ema hateten UNPAZ mak Profesór Lucas da Costa no Profesór Lucas da Costa mak UNPAZ.

“Maibé iha fulan ida loron 14 nia laran hamutuk ho estrutura foun ne’ebé hetan tomada de posse husi Fundasaun Neon Metin, ita rekoopera tiha dúvida públiku nia ba Universidade da Paz, sira dehan Universidade da Paz mout daudauk ona, situasaun pelo kontráriu”.

Notísia relevante:Reitór UNPAZ “Ho Matan-Been” Hato´o Lia-Menon Ba Judisiáriu 390

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here