Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/António Gonçalves

DILI, 13 dezembru 2019 (TATOLI) – Sekretaria Estadu Komunikasaun Sosiál (SEKOMS) no Fundu Dezenvolvimentu Kapitál Umanu (FDCH-sigla Portuges) durante ne’e halo kooperasaun hodi loke oportunidade formasaun ba funsionáriu sira iha área oin-oin.

Sekretáriu Estadu Komunikasaun Sosiál, Merício Juvinal dos Reis ‘Akara’, observa kooperasaun ne’ebé la’o ona hatudu rezultadu pozitivu no funsionáriu sira bele aproveita formasaun ho di’ak hodi implementa iha serbisu fatin.

“Kontente tebes tanba durante ne’e ita hala’o kooperasaun servisu hamutuk ho FDCH hodi fó formasaun ba ita nia funsionáriu sira, hodi konsege iha semana ida nia laran sira bele hetan sertifikadu iha área design graphic, halo website no seluk tan”, dehan Akara iha Palásiu Governu, sesta ne’e.

Governante ne’e subliña, funsionáriu hamutuk 37 husi SEKOMS no Ministériu Reforma Lejislativa no Assuntu Parlamentar (MRLAP) mak partisipa iha formasaun ne’e.

Formasaun ne’e hala’o hosi Southeast Asia Freedom of Expression Network (Safenet) Indonézia.

Iha biban entrega sertifikadu, Akara husu ba formandu sira atu implementa matéria ne’ebé sira hetan durante semana ida nia laran iha servisu fatin ida-idak.

“Governu kontente los. Maibé funsionáriu sira mós tenke aproveita ho di’ak matenek hirak ne’ebé ema fó ne’e”, nia realsa.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here