Espoza Prezidente Repúblika, Cidália Nobre Mouzinho Guterres hamutuk ho Xefe Kaza Sivíl, Francisco Maria de Vasconcelos akompaña husi autoridade lokál haree direta kondisaun vítima inséndiu iha eis Merkadu Comoro. Imajen TATOLI/Cipriano Colo

DILI, 14 dezembru 2019 (TATOLI)–Estudante na’in ruanulu resin-neen (26) husi nível ensinu báziku to’o nível universidade, lakon dokumentu importante oioin kauza husi inséndiu iha eis Merkadu Comoro, Aldeia 03, Suku Fatuhada, Munisípiu Dili, 9 dezembru, tinan ne’e. 

Tipu dokumentu importante ne’ebé ahi han mak hanesan kartaun eleitorál, billete identidade (BI), sertidaun RDTL, pasaporte, sertidaun batizmu, kaderneta, sertifikadu no seluk tan.

Estudante Miguel Soares ne’ebé lakon diploma (ijasah-sigla Indonézia) eskola pré-sekundáriu haktuir katak ninia dokumentu rai hela iha armari laran, bainhira akontese ahi han uma ho volume boot, la konsege salva.

“Momentu ahi han uma ne’e ami hotu ta’uk no halai dook tanba ahi ho volume ne’ebé boot. Tanba ne’e mak ha’u-nia diploma ne’e ahi han hotu”, Miguel konta tuir.

Kona-ba kestaun ne’e, Anselmo Gusmão (52) nu’udár inan-aman reprezenta família estudante sira ne’ebé hanesan mós vítima husu ba autoridade lokál atu halo rekomendasaun ba estudante hirak ne’ebé ahi han mutuk sira-nia dokumentu importante, nune’e sira bele kontinua asesu edukasaun no laiha impedimentu ruma.

Lee mós: Vítima Inséndiu Comoro Agradese Apoiu Solidariedade husi Prezidénsia Repúblika

Anselmo aprezenta asuntu ne’e bainhira Xefe Kaza Sivíl Prezidénsia Repúblika, Francisco Maria de Vasconcelos hamutuk ho Espoza Prezidente Repúblika, Cidália Nobre Mouzinho Guterres hala’o vizita no oferese apoiu solidariedade ba vítima sira iha fatin akontesimentu, sábadu ne’e.

“Ami hakarak atu husu ba inan nasaun no mós Xefe Kaza Sivíl, hato’o hela ami-nia preokupasaun ba Prezidente Repúblika liuliu ami-nia oan sira lubuk ida mak ahi han hotu sira-nia dokumentu importante sira, oinsá Prezidente Repúblika ko’alia ho Governu atu bele haree asuntu ne’e tanba dezastre ne’e ita nunka espera. Ami hakarak dehan katak ami-nia oan sira ne’ebé lakon sira-nia diploma, oinsá mak ministériu relevante bele prodús hikas,  ka mekanizmu oinsá mak bele hetan”, nia sujere.

Anselmo mós submete kedas lista estudante sira husi ensinu báziku to’o universidade hamutuk na’in 26 ne’ebé lakon sira-nia dokumentu importante no husu atu autoridade lokál atende estudante hirak-ne’e hodi halo rekomendasaun ruma, nune’e labele prejudika sira-nia estudu.

Iha fatin hanesan, Xefe Suku Fatuhada, Marcelino Soares, hanesan autoridade lokál deklara prontu atu atende estudante sira ne’ebé lakon dokumentu importante no sei fó liu prioridade ba sira atu halo deklarasaun, nune’e bele fasilita sira atu halo rekomendasaun bainhira presiza.

“Ha’u prontu oras 24 nia laran atu trata imi-nia dokumentu sira ne’ebé lakon. Ha’u iha tanba imi, tanba ne’e ha’u sei fó prioridade ba imi hirak ne’ebé lakon dokumentu tanba dezastre”, Marcelino deklara ninia prontidaun.

Entretantu, Xefe Kaza Sivíl, Francisco Maria de Vasconcelos fiar katak xefe suku ne’ebe besik liu vítima sira sei atende hodi rezolve dokumentu importante ne’ebé lakon.

Inséndiu akontese iha 9 dezembru, rezulta uma hamutuk 91 mak ahi han mutuk, inklui dokumentu importante sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here