Sekretáriu Estadu Komunikasaun Sosiál, Merício Juvenal dos Reis Akara. Imajen /Tatoli Egas Cristovao

DILI, 13 dezembru 2019 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, hala’o soru-mutuk ho reprezentante Xefe Suku Ponta Leste na’in-tolu hosi Suku Muapitine no Lore 2 iha Postu Administrativu Lospalos, Munisípiu Lautém no Suku Afaloicai iha Portu Administrativu Baguia, Munisípiu Baucau, hodi ko’alia kona-ba Programa Naroman ba Suku.

“Xefe Suku na’in-tolu ne’e hanesan fulan hirak liubá, ha’u dehan ona ba públiku katak iha Timór tomak ita hili suku ualu sai hanesan pilotu ba Programa Naroman ba Suku. Entaun, Xefe Suku na’in tolu ne’e, ohin mai ko’alia kona-ba Programa Naroman ba Suku atu implementa iha sira nia suku”, tenik Akara iha Palásiu Governu, sesta ne’e.

Ba inisiativa ida-ne’e, Sekretaria Estadu Komunikasaun Sosiál (SEKOMS) sei halo transferénsia osan ho montante $10.000 ba konta bankária kada suku tolu ne’e hodi bele implementa programa.

Governante ne’e hatutan, antes ne’e, Governu implementa ona programa refere iha suku sira hosi parte rai klaran iha Munísipiu Manufahi, Aileu, Ermera no Bobonaro, enkuantu parte leste seidauk.

“Ohin, suku tolu ne’ebé reprezenta parte leste nian, iha tempu besik sira sei hala’o sira-nia atividade mak oinsá harii sentru informasaun iha sira-nia suku. Entaun, SEKOMS iha ninia polítika hodi apoiu inisiativa ida-ne’e hodi utiliza fali sentru informasaun ne’ebé mak sei harii hodi bele fó mós formasaun ba ita-nia joven sira iha nível suku ninian atu sira bele iha koñesimentu kona-ba servisu jornalizmu nian”, ni subliña.

Nia haklaken, bainhira programa hirak-ne’e la’o di’ak hotu, komunidade iha área remota sira bele asesu di’ak ba informasaun.

Iha sorin seluk, Xefe Suku Muapitine, Livio Mendes, agradese ba SEKOMS ne’ebé iha inisiativa di’ak hodi apoiu suku sira iha área rurál bele asesu ba informasaun.

“Inisiativa ida-ne’e di’ak tebes. Sekretáriu Estadu mós orienta ami kona-ba orsamentu ne’ebé fó ba ami tenke jere ho di’ak atu harii sentru informasaun ne’ebé bele fó benefísiu ba komunidade hotu iha área rurál. Entaun, ami agradese tebes”, dehan Livio.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here