Xefe Kaza Sivíl Prezidénsia Repúblika, Francisco Maria de Vasconcelos, entrega simbólikamente sasán nesesidade bázika ba vítima inséndiu no dezastre naturál iha Hatolia B. Imajen TATOLI/Cipriano Colo

ERMERA, 13 dezembru 2019 (TATOLI)–Prezidénsia Repúblika, sesta ne’e, oferese sasán nesesidade bázika ba komunidade afetadu inséndiu no dezastre naturál iha Suku Lisapat, Ma’úbu no Urahou, Postu Administrativu Hatolia Zona B, Munisípiu Ermera. 

Sasán hirak-ne’e oferese direta husi Xefe Kaza Sivíl Prezidénsia Repúblika, Francisco Maria de Vasconcelos, iha Eskola Ensinu Báziku, Aldeia Hatupá, Suku Lisapat.

Xefe Kaza Sivíl iha serimónia entrega, hateten Prezidénsia Repúblika oferese sasán hirak-ne’e ba maluk vítima sira tanba koopera ho emprezáriu timoroan sira hodi bele fó apoiu nesesidade bázika ba sidadaun Timor-Leste ne’ebé afeta ba dezastre naturál no inséndiu.

“Materiál nesesidade bázika hirak-ne’e, Prezidente Repúblika, Francisco Guterres Lú Olo ko’alia ho emprezáriu timoroan hanesan Oscar Lima nu’udar Ermera-oan hamutuk ho maluk sira, tau hamutuk sasán no finanseiru ho Prezidénsia Repúblika, hodi apoiu sasán nesesidade bázika ba vítima dezastre naturál no inséndiu ne’ebé akontese iha fulan hirak liubá”, Xefe Kaza Sivíl haktuir.

Lee mós: Governu Distribui Apoiu ba Vítima Inséndiu iha Liquiça ho Ermera

Nia esklarese, antes ne’e, Prezidente Repúblika konvida emprezáriu timoroan sira-ne’e ba Palásiu Prezidensiál no husu sira-nia meiu no mekanizmu kontribuisaun ne’ebé bele tulun komunidade vítima dezastre naturál no inséndiu.

Husi konsulta Prezidente Repúblika nian ne’e, Vasconcelos hatutan, ikus mai sira prontu hodi kontribui sasán, finanseiru no Prezidénsia Repúblika mós aloka osan, hodi sosa sasán nesesidade bázika hirak-ne’e.

Xefe Kaza Sivíl mós hato’o mensajen Prezidente Repúblika nian ba vítima sira katak sasán hirak ne’ebé parte prezidénsia oferese la’ós tanba Prezidente ‘kasian’ vítima sira, maibé Prezidente Repúblika iha nia responsabilidade ba nia sidadaun sira tanba Prezidente preokupa duni ho sidadaun ida-idak nia moris.

Iha fatin hanesan, Xefe Suku Mau’úbu, Domingos Noronha reprezenta vítima Inséndiu no dezastre naturál agradese ba Prezidénsia Repúblika ne’ebé oferese ona sasán nesesidade báziku ba vítima sira, maibé nia kontinua preokupa mós ho maioria vítima ne’ebé sei hela iha lona okos.

“Hanesan autoridade lokál, hakarak agradese ba apoiu husi Prezidénsia Repúblika, no ami rekomenda nafatin atu Prezidente Repúblika hato’o ba Governu hodi tau-matan ba vítima sira ne’ebé sei hela iha lona okos, tanba agora mós udan monu rai ona”, nia haklaken.

Entretantu, sasán nesesidade bázika ne’ebé Prezidénsia Repúblika oferese ba vítima sira mak hanesan foos, mina, bikan, kanuru, sanan, masin, super mie, balde, gayung, sakola, tolla, manta, klin, kanedok, trina etu, eskova, pastadente no sabaun haris.

Dezastre naturál no inséndiu iha Munisípiu Ermera akontese iha Postu Administrativu Hatolia Zona B espesifikamente iha suku tolu hanesan: Suku Ura-Hou, Lisapat no Mau-Ubu.

Totál uma ne’ebé hetan estragu hamutuk 434, tipu estragu mak hanesan ahin-han uma (inséndiu) hamutuk 98, anin sobu 336 no plantasaun kafé ektare 350.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here