Fahi ne’ebé soe naklekar iha Mota Trisula, Lospalos. Imajen/Tatoli

LAUTEM, 13 dezembru 2019 (TATOLI) – Resposavel Kontrolu Moras Hada’et no Vijilánsia Epidémiku, Ministériu Saúde Munisipiu Lautem, Alberto da Costa, hateten fahi ne’ebé mate no soe arbiru iha mota-laran bele fó impaktu ba saúde públika.

“Ha’u sente triste tanba komunidade sira soe arbiru fahi ne’ebé mate iha mota-laran, ida ne’e fó impaktu ba saúde públika, hanesan moras ISPA, isin katar no diarreia”, Alberto da Costa dehan ba Ajénsia TATOLI, kinta ne’e.

Ministériu Saúde halo asaun sensibilizasaun kuidadu ambientál ba komunidade sira, atu labele soe fahi mate arbiru liuliu iha mota-laran, maibé komunidade sira maka lakohi kumpre no haruka fali ministériu maka lori fali karreta hodi hasai fahi mate iha mota-laran.

Iha fatin hanesan, Xefe Departamentu Pekuáriu no Veternáriu, Munisípiu Lautem, Zito Guimarães, preokupa komunidade sira tanba soe fahi iha mota-laran hodi estraga ambiente.

“Komunidade sira-nia fahi mate ne’e soe arbiru, iha mota-laran ka rai-maran, sira la hakoi, ida ne’e afeta tebes ambiente no saúde ema hotu nian, tanba ne’e ami husu ona autoridade lokál atubele atende kestaun ne’e”, preokupa.

Atu hasai fahi iha mota-laran, nia dehan MAP maka tun direta hodi hasai fahi maka imposivel tanba tékniku no ekipamentu menus.

Atu asegura fahi balun ne’ebé sei moris, MAP iha ona planu atu estabelese klínika saúde animál iha Postu Administrativu Lospalos, Tutuala no Luro, enkuantu husu ba MAP nasionál atu apoia ai-moruk, entretantu, ofisiál tékniku pekuária no veteránaria iha Munisípiu Lautem hamutuk 16.

Hahú iha 15 setembru to’o novembru Ministériu Agrikultura no Peska (MAP), Munisípiu Lautem, rejista fahi mate hamutuk 1.664.

Notísia relevante : Fahi 1.664 Mate Afeta Tebes ba Ekonomia Munisípiu Lautem

Jornalista: Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here