Terminál Tasitolu. Foto/Natalino Costa.

DILI, 13 dezembru 2019 (TATOLI) – Xefe Departementu Diresaun Nasionál Transporte Terrestre (DNTT) Ministériu Transporte no Komunikasaun (MTK),  João Eugénio da Silva, hateten sei koordena ho Diresaun Terra Propriedade (DTP) Liquiçá hodi hahú ko’alia sobre fatin ba kontrusaun terminál Tasitolu ne’ebé sei muda bá área Tibar.

“Tempu badak nia laran ami ho ami-nia ministeriu sei bá halo koordenasaun ho sira Land Property Liquiçá hodi hahú diskute fatin ba kontrusaun terminál Tasitolu ne’ebé sei muda bá Tibar”, dehan nia ba Ajénsia TATOLI via telemovel, ohin.

Konstrusaun terminál Tasitolu liuhusi desizaun Primeiru-Ministru nian kansela tiha tanba konstrui iha zona protejida no sítiu istóriku tanba Governu iha planu atu halo prezervasaun.

“Ami halo ona atualizasaun ba iha Land Property Liquiçá, maibé seidauk hasoru malu loloos ho sira hodi bele haree rai atu halo terminál ne’e iha uitoan ne’ebé, maizumenus distánsia rai ne’e hira, rai nia estatutu ne’e oinsá, Governu nian ka privadu”, João Eugénio tenik.

Tanba ne’e presiza hasoru direta hodi buka hatene loloos rai ne’e nian estatutu, nune’e maka DTP no MTK foin halo karta ba Ministériu Justisa atubele hetan autorizasaun hodi hahú ona konstrusaun ba terminál foun ne’e.

Iha sorin seluk, Diretór Jerál Administrasaun Finansa MTK, Deonísio de Araújo, hatutan seidauk bá ko’alia ho parte DTP Liquiça tanba sei okupadu hela ho serbisu balun.

Hodi hatutan bainhira la okupadu ona maka halo aproximasaun ho Terra no Propriadade Liquiçá ba kestaun rai ne’ebé atu harii terminál foun ne’e.

Terminál Tasitolu konstrui husi empreza Mar Vermelha ne’ebé atinje ona 80%, maibé labele kontinua obra ne’e. Orsamentu ba konstrusaun ne’e mai husi Konsellu Administrasaun Fundu Infraestrutura ho montante inisiál $346. 340,27 ne’ebé hahú iha 2014.

Aléinde ne’e, kona-ba konstrusaun terminál, Konsellu Administrasaun Fundu Infraestrutura (CAFI, sigla portugés) foin lalais aprova ona proposta husi MTK nian ba estudu viabilidade terminál Tibar, inklui Hera no Manleuana.

“CAFI rasik liuhosi diskusaun aprova proposta estudu viabilidade ba konstrusaun terminál tolu”, Ministru Transporte no Komunikasaun, José Agostinho da Silva ba Ajénsia TATOLI, foin lalais ne’e.

Ministru salienta terminál Becora, espasu labele akumula ona pasajeiru no movimentasaun transporte, tanba afeta engarrafamentu, nune’e sei muda bá Hera, no mós terminál Tibar, hanesan orientasaun Primeiru-Ministru nian, inklui MTK sei konstrui terminál ida iha Manleuana hodi fó atendimentu ba pasajeiru sira iha rai-klaran.

Maski estudu viabilidade aprova ona, maibé orsamentu seidauk hetan aprovasaun hosi CAFI.

Molok Konstrui Terminál iha Tibar, MTK Sei Koordena ho Liña Ministeriál

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here