Autoridade Servisu Alfandega halo hela pasa revista ba visitantes sira neebe tama sai iha Fronteira Motaain,Batugade. Imajen/Agapito dos Santos

OÉ-CUSSE,13 dezembru 2019 (TATOLI)-Servisu Alfándega iha Rejiaun Administrativa Espesiál Ambeno Oé-Cusse (RAEOA) to’o oras ne’e, seidauk iha mákina raiu-xís (X-ray sigla Inglés) hodi halo pasa-revista ba sasan importasaun no esportasaun iha Postu Integradu Fronteira Sakato.

Diretór Alfándega Rejionál Oé-Cusse, José da Costa, ba TATOLI, iha Palaban RAEOA,sexta ohin,  informa problema laiha ekipamentu ne’e afeita ba servisu instituisaun Autoridade Aduaneira atu deteta ai-moruk droga, bala musan, osan mean no seluk tan.

Notísia Relevante:Mákina Raiu-xís iha Motain Avaria Besik Tinan Ona

“Difikuladade bo’ot maka mákina raiu-xís laiha hodi halo pasa revista ho manuáll de’it,”Diretór,José da Costa, preokupa.

Tuir Nia, antes ne’e informa ona problema ne’e ba iha Autoridade RAEOA, maibé to’o ohin seidauk hetan resposta. Tanba ne’e, nia garante liuhosi públikasaun informasaun ne’e, bele hetan solusaun lalais hosi Prezidente Autoridade foun,José Luis Guterres.

La’os falta mákina x-ray  de’it maibé,  Autoridade Aduaneira Oé-Cússe mós  seidauk  edifísiu tanba ne’e afeita ba pesoál sira atu halo servisu lorloron.

Nia dehan problema seluk tan maka pesoál sira seidauk iha koñesementu no abilidade naton atu oinsá deteta ai-moruk droga sira no ekipamentu ne’ebé proibidu tanba ne’e presiza formasaun intensivu ba funsionáriu sira iha futuru.

Hosi parte seluk, Diretór ne’e relata durante fulan-janeiru to’o novembru 2019, Servisu Alfándega Oé-Cusse kobra ona reseita ba kofre estadu hamutuk $788,275.30.

Notísia Relevante:Servisu Alfándega Rekolla Reseita $879,908 ba Kofre Estadu

“Reseita hirak ne’e rekolla maihosi taxa venda,taxa seletivu no infrasaun ba penalidade nian,  brokér sira selu direita ba iha Banku Nasionál Ultramarinu (BNU-siglá-portugés),maibé sasan komérsiu tenke selu maibé ba ida privadu ho kustu $300 mai kraik ne’e la selu, “Nia esplika.

Notísia Relevante:Fulan Ualu, Alfándega Covalima Rekolla Taxa $55.510,87

Taxa hirak ne’e,  kobra hosi Emprezáriu Oé-Cusse oan no sidadaun estranjeiru ne’ebé maka  importa materiál konstrusaun, sasan nesesidade báziku hosi Kupang no Atambua Indonézia bá Oé-Cússe.

Entretantu, Funsionáriu Alfándega  hamutuk na’in 39, permante na’in sia no kontratdu 30 maka destaka servisu iha iha RAEOA.

Jornalista:Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here