Pioneru Federasaun Muay Thai no Mixed Martial Arts (MMA) Lafaek Timor-Leste, Abrão Fernandes. Imajen: Jogerjo Guterres

DILI, 13 dezembru 2019 (TATOLI)—Pioneru Federasaun Muay Thai no Mixed Martial Arts (MMA) Lafaek Timor-Leste, Abrão Fernandes, informa tuir planu iha tinan 2020 Federasaun Muay Thai no MMA Timor-Leste sei realiza kompetisaun internasionál no nasionál iha Timor-Leste.

Nakait ba komepetisaun refere, fundadór no atleta profesionál MMA ne’e hatutan, eventu refere hanesan meius ida hodi hatutan no hamoris jerasaun tuan sira-nia luta hodi kontribui ba dezenvolvimentu nasaun Timor-Leste liuhusi desportu.

“Ita-nia nasaun ukun-aan tiha ona maibé oinsá ita atu kontribui ita-nia nasaun ne’e. Meius ida atu kontribui mak iha rua. Primeiru liuhusi siénsia no daruak mak desportu. Liuhusi siénsia no desportu, ita bele dezenvolve ita-nia nasaun,” dehan Abrão Fernandes ba Ajénsia TATOLI liuhusi dadalia ne’ebé hala’o iha Edifisiu TATOLI,IP, Farol, Dili, Sábadu (13/12/2019).

Nia hatutan, maske uluk ema la koñese Timor-Leste ne’e iha ne’ebé maibé agora liuhusi desportu MMA mundu koñese ona Timor-Leste. Tanba ne’e, nia dehan, liuhusi kompetisaun internasionál ne’ebé sei realiza iha tinan oin ne’e, Federasaun Muay Thai no MMA Lafaek Timor-Leste luta dala ida tan hodi foti no lori Timor-Leste ba mundu.

“Ita-nia luta na’in sira mate hotu ona. Maibé, ohin loron, ita jerasaun foun sira-nia luta agora mak foti Timor nia naran ba mundu tomak katak ita mós bele. Tanba, uluk ema la hatene Timor-Leste maibé ohin loron ema hotu hatene ona. Ne’ebé, husu ba joven sira lalika mete problema maibé oinsá dezenvolve ita nia-aan hodi lori Timor ba mundu,” nia tatoli.

Mensajen ida ne’e, tuir nia, nia haklaken ba juventude sira tanba tuir planu iha 2020 Federasaun Muay Thai no MMA Lafek Timor-Leste sei realiza kompetisaun nasionál no internasionál iha Timor-Leste ne’ebé sei konvida atleta MMA husi nasaun Asia sei mai figth  luta ho atleta MMA timoroan sira.

“Federasaun Muay Thai no MMA Lafaek kada tinan sempre iha programa ne’ebé 2020 sei halo eventu jogu internasionál no nasionál iha Timor-Leste. Eventu ne’e hetan doadór prinsipál husi Telkomcel ne’ebé sei tulun federasaun atu realiza eventu importante ida ne’e,” Abrão Fernandes hateten.

Iha kompetisaun ne’e, nia informa, atleta kompetitór MMA sira ne’ebé sei tuir jogu internasionál iha Timor-Leste iha 2020 ne’e, espesífiku liu ba nasaun Asia mak hanesan Filipina, Indonézia, Malázia, Singapura, Vietname, Brunei Darussalam, Tailándia no mós Austrália.

Nia informa, ba atleta internasionál sira ne’ebé sei mai partisipa jogu Internasionál iha Timor-Leste ne’e, mai tuir jogu komforme tuir idea-idak nia klase.

“Konforme ita-nia presiza. Hakarak klase hira mak hasoru malu ho klase seluk. Entaun, ita foti klase ida para hanesan ho klase seluk ne’e, konforme ita haree ita-nia ema (atleta) ne’ebé mak iha kualifikadu ita haree nia kapasidade ne’ebé maka bele hodi bele tuir jogu ne’e. Tanba, fee ba atleta no ofisiál sira no akomodasaun sira ne’e Timor-Leste nia responsabilidade,” nia informa.

Ba atleta timoroan, nia esplika, timoroan sira ne’ebé sei kompete iha jogu internasionál 2020 ne’e, oras ne’e sira preparadu ona tanba preparasaun ba sira-nia treinamentu ne’e sufisiente ona. La’ós atu ba tuir jogu mak treinu maibé atleta timoroan sira kada loroloron sira treinu no sra preparadu ona.

“Loos! Alteta MMA timoroan ne’e barak loos tiha ona. Ita foin halo kompetisaun dala rua maibé ita hahú manan ona sira. Maske ita lakon barak tanba ita foin hahú. Ne’e hatudu katak ita mós bele ona para hasoru nasaun seluk,” nia salienta.

Nia subliña, orsamentu ne’ebé sei utiliza ba jogu internasionál no nasionál iha 2020 ne’e ninia totál hamutuk $50.000. Maske Federasaun Muay Thai no MMA Lafaek Timor-Leste foin hamriik atu ba tinan rua maibé konsege hala’o ona eventu jogu nasionál dala rua (2) ona. Ezatamente, nia informa, Governu Timor-Leste mós fó apoiu liuhusi Sekretária Estadu Juventude no Desportu (SEJD).

Oinsá kona-ba rekursu umanu ba árbitru ninian, nia hatán, iha Timor-Leste kestaun rekursu umanu ba árbitru ne’e iha tiha ona no sira bele hala’ao sira-nia knaar iha eventu refere. Maske nune’e, nai dehan, Timor-Leste sei presiza árbitru internasionál husi rai li´ur hodi haforsa árbitru timoran sira.

“Jogu dahuluk ne’ebé hala’o iha tiha ona iha Munisípiu Suai, hetan ajuda referee (árbitru ) husi Malázia no Indonézia ne’ebé hetan apoiu husi husi Timor Gap. Jogu daruak. ita mak kria rasik, ne’ebé rekursu ne’e ita-nian rasik. Ne’e hatudu katak jogu tuir mai ne’e, ita timoroan sira prontu ona hala’o knaar nu’udar referee,” nia haktuir.

Tuir planu, nia haklalen, jogu internasionál iha 2020 sei hahù iha fulan Janeiru no sei hala’o tután iha fulan Marsu. Maibé, tuir nia, jogu ikus ne’ebé akontese iha Marsu ne’e jogu nasionál tanba klaramente timoroan hotu iha interrese atu apoiu hanesan patrosíniu tanba Timor-Leste iha ona rekursu umanu atu hala’o ida ne’e.

Nia dehan, agora Tinor-Leste konsentra ba jogu nasionál no internasionál ne’ebé sei hala’o iha 2020 ne’e iha posibilidade sei lori ba to’o iha munisípiu sira seluk. Iha Timór, tuir nia, aliende halao kompetisaun iha Kapitál Dili maibé sei hala’o iha Munisípiu Lospalos tanba munisípiu refere iha ona rekursu no sei foka mós ba kalendáriu internasionál.

“Agora ita sei konsentra hotu iha Timor-Leste no ita sei posível tuir mós kalendáriu internasionál. Maibé, agora daudaun tuir kalendáriu nasionál,” nia dehan.

Notísia relevante:Abro Fernandes: “Ha’u Prontu Atu Manán”

Jornalista        : Cancio Ximenes
Editór              : Rafy Belo

HAKEREK NO HATÁN

Please enter your comment!
Please enter your name here