Xefe Kaza Sivíl Prezidénsia Repúblika, Francisco Maria de Vasconcelos. Imajen/Mídia PR

DILI, 12 dezembru 2019 (TATOLI)–Prezidénsia Repúblika ezekuta ona orsamentu jerál Estadu (OJE) tinan 2019 to’o pursentu 80 ona.

“Ami-nia ezekusuan to’o ona pursentu 80. To’o loron 20 fulan dezembru, bainhira kompleta ona pagamentu sira, ami bele atinje pursentu 85”, Xefe Kaza Sivíl Prezidénsia Repúblika, Francisco Maria de Vasconcelos hato’o asuntu ne’e ba TATOLI iha Palásiu Prezidente Nicolau Lobato, Bairru Pité, Dili, ohin.

Xefe Kaza Sivíl esplika ezekuaunn ne’e ba Bens Serbisu, Saláriu no Vensimentu, Kapitál Menór no Transferénsia Públika.

Iha Saláriu no Vensimentu, nia hatutan, selu ba funsionáriu sira, entretantu Bens Serbisu ba halo atividade sira, liuliu kona-ba kompromisu Prezidente Repúblika nian, selu asesór sira, viajen lokál no viajen estranjeiru pratikamente laiha tanba Parlamentu Nasionál la aprova, inklui manutensaun ba karreta sira.

Kona-ba Transferénsia Públika, Francisco hatutan, Prezidénsia Repúblika ajuda estudante sira no mós apoiu grupu sira-ne’ebé halo negósiu inklui sira-ne’ebé haki’ak animál.

“Transferénsia Públika ne’e Prezidente ajuda de’it sira-ne’ebé presiza duni, tanba Prezidente la’ós ezekutivu. Tanba ne’e, Prezidente la halo programa ida-ne’ebé sistemátiku, maibé haree hodi apoiu de’it sira-ne’ebé hatama pedidu. Ida-ne’e mós la’ós hotu-hotu fó apoiu. Bainhira ema hatama proposta, ami sei verifika didi’ak mak bele fó apoiu ba sira”, Xefe Kaza Sivíl haktuir.

Nia mós sita orsamentu Transferénsia Públika Prezidénsia Repúblika ba tinan 2019 ho montante $100.000,00, ezekuta ona $98.000,00 no hela de’it $2.000,00 no bainhira selu hotu iha semana ne’e sei hela de’it $600.00.

Kona-ba viajen estranjeiru, nia dehan, tanba prezidénsia iha nesesidade, pur-ezemplu karreta sira-ne’ebé tuan ona, balun liu ona tinan lima, tanba ne’e tenke halo transferénsia balun, hodi sosa karreta tolu ba Kaza Militár no tolu ba Kaza Sivíl, atu bele uza hodi substitui karreta operasionál sira bainhira Prezidente Repúblika hala’o vizita ba munisípiu.

Entretantu, orsamentu jerál Estadu ba Prezidénsia Repúblika iha tinan 2019 hamutuk millaun $7.5 no proposta ba tinan 2020 hamutuk millaun $7.8.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here