Komandan Operasaun PNTL, RAEOA, Domingos Quim.Imajen/Domingos Piedade

OÉ-CUSSE, 12 dezembru 2019 (TATOLI)–Tuir dadus hosi Komando Operasaun Polisia Nasionál Timor-Leste, Rejiaun Administrativa Espesiál Oé-Cusse Ambeno (RAEOA) relata durante fulan sanulu-resin-ida hahú janeiru to’o novembru 2019  rejista ona kazu krime  ba violénsia doméstika simples no kazu agravadu hamutuk 60.

Komandante Operasaun, Inspetór Polisia Domingos Quim, hateten ninia parte delega ona kazu hirak ne’e ba iha Ministériu Públiku hodi prosesa tuir lei ne’ebé maka vigóra.

“Ha’u hanoin kazu krime mak hanesan kazu violasaun doméstika simples no agravadu hamutuk 60 mak rejista ona iha PNTL,”dehan, Nia iha salaun Administrasaun Oé-Cusse bainhira partisipa programa konsulta públika  kona-ba lei justisa tradisionál no kostumeiru, kinta ohin.

Durante 2019, PNTL RAEOA la rejista kazu omesidu agravadu tanba ne’e, Inspetór Polisia ne’e promete sei halo esforsu atu oinsá preve no kombate krime no konflitu sira iha komunidade nia leet.

“Situasaun kontroladu no  la iha krime boot ruma ne’ebé  maka akontese iha Oé-Cusse,” Nia tenik tan.

Atu garante situasaun ida pás no hakmatek durante selebrasaun loron boot natal no tinan foun iha Oé-Cusse maka Komandante Operasaun Polisia, Domingos Quim, husu ema hotu-hotu atu kolabora no kontribui  ho Polisia atu halo patrullamentu.

Jornalista : Domingos Piedade Freitas

Editór       :Francisco Simões

HAKEREK NO HATÁN

Please enter your comment!
Please enter your name here