Diretór Konservatóriu Rejistu no Notariadu (CRN, sigla portugés), Munisípiu Lautem, Nixon Dias da Gama Ximenes. Imajen/Tatoli.

LAUTEM, 12 dezembru 2019 (TATOLI) – Diretór Konservatóriu Rejistu no Notariadu (CRN, sigla portugés), Munisípiu Lautem, Nixon Dias da Gama Ximenes, relata daudaun ne’e rekursu umanu no ekipamentu seidauk sufisiente atu fó atendimentu ba públiku ho di’ak.

Joven no inan-aman sira trata dokumentu iha CRN Lautem/Imajen Tatoli.

“Ami na’in-neen no uza komputadór ida de’it hodi atende populasaun kuaze 4.500 iha munisípiu Lautem”, tenik nia ba Ajénsia TATOLI iha kna’ar fatin, ohin.

Nia dehan ekipamentu no rekursu umanu menus, maibé esforsu hodi kada loron atende ema 100 to’o 200 ne’ebé trata Sertidaun RDTL, Billete Identidade (BI), sertidaun Óbitu no Rejistu Kriminál.

Hodi salienta katak daudaun ne’e, joven barak hahú trata dokumentu ba Sertidaun Moris RDTL nia tanba rekrutamentu FALINTIL-Forsa Defeza Timor-Leste (F-FDTL) foun iha tinan ne’e.

“Dalabarak populasaun balu mai hakilar ami tanba ami labele atende lalais, maibé ami husu atu sira hakmatek no kria estabilidade hodi simu atendimentu”, katak.

Maski nune’e, funsionáriu CRN mós hakarak serbisu voluntáriu iha sábadu no domingu, más server labele loke tanba lei la permite.

Tanba ne’e, nia rekomenda ba Governu liuhusi Ministériu Justisa atu konstrui edifísiu, rekrutamentu ba funsionáriu no apoia komputadór.

“Edifísiu kloot, funsionáriu oituan de’it no laiha meza no kadeira atubele fasilita ami-nia serbisu, husu Governu atu rezolve ida ne’e”, kestiona.

Iha janeiru to’o novembru atende komunidade 1.500 husi postu administrativu lima maka Luro, Tutuala, Lospalos, Lautem no Iliomar.

“Tratamentu ba dokumentu sira ne’e sei gratuitu tanba orientasaun husi nasionál”, konklui.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here