Ró Haksolok. Imajen dok. ZEESM

DILI, 12 dezembru 2019 (TATOLI)–Prezidente Autoridade Rejiaun Administrativa Espesiál Oé-Cusse Ambeno (RAEOA), José Luís Guterres, hateten autoridade sei la investe tan ba rekuperasaun Kompañia Atlantic Angle Ship Building husi Portugál ne’ebé bankarota no laiha ona kapasidade finanseiru atu kontinua obra Ró Haksolok. 

“Autoridade RAEOA la’ós atu lori fali orsamentu ne’ebé Parlamentu Nasionál aprova hodi tau fali halo rekuperasaun ba empreza ne’ebé osan laiha ona atu halo konstrusaun ba ró. Ida-ne’e signifika má jestaun ba orsamentu públiku no bele iha mós prosedimentu kriminál”, tenik José Luís Guterres ba jornalista sira hafoin enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato,  Bairru Pité,  Dili, kinta ne’e.

Notísia Relevante: PM Delega Ministru Hermenegildo Akompaña Kazu Ró Haksolok

Nia lamenta tanba tuir loloos antes atu halo kontratu ho kompañia, Governu tenke buka hatene kona-ba kompañia ninia kapasidade finanseiru katak bele konstrui ró to’o ramata ka lae.

“Ita halo iha rai Portugál ne’ebé nu’udar belun di’ak ba Timor-Leste, maibé iha konsiderasaun barak ne’ebé tenke haree hanesan Estadu. Autoridade RAEOA rasik sei la investe tan osan atu rekupera empreza ne’ebé bankarota tiha ona”, nia hateten.

Maski nune’e, Prezidente Autoridade kontente no aproveita oportunidade ne’e hodi informa ba Xefe Estadu katak kazu Ró Haksolok, daudaun ne’e Governu mak responsabiliza no Governu rasik mak kontinua buka dalan atu rezolve.

“Aproveita oportunidade ne’e, informa ba Prezidente Repúblika katak parte autoridade simu ona informasaun husi Primeiru-Ministru, Taur Matan Ruak, katak kazu Ró Haksolok oras ne’e iha ona Governu nia liman”, nia subliña.

José Luís aprofunda, kazu ne’e iha ona prosesu judisiál iha Tribunál Coimbra-Portugál kuaze fulan tolu ona tanba kompañia Atlantic Angle Ship Building ne’ebé uluk halo kontratu ho Governu Timor-Leste hodi halo konstrusaun ba Ró Haksolok hetan problema finanseiru.

“Tuir loloos, ohin loron, 12 fulan dezembru, Autoridade RAEOA tenke fó reposta ruma ba Tribunál Coimbra kona-ba prosesu ne’ebé oras ne’e la’o hela maibé tanba kazu ne’e iha ona Governu ninia responsabilidade maka Governu rasik mak tenke fó resposta”, nia haklaken.

Agora bá oin, José Luís husu hotu-hotu tenke haree asuntu Ró Haksolok nu’udar asuntu Estadu, tanba Estadu rasik investe ona kuaze millaun $20 ba konstrusaun ró refere.

Ró Haksolok ho kustu millaun €13,7, inaugura iha loron 26 maiu 2017 iha sidade Figueira da Foz, Portugal no tuir informasaun sei to’o Timor-Leste iha outubru 2017, maibé tanba problema internál husi kompañia Atlantic Eagle Ship Building ho sub-kontratórvmaka to’o agora ró seidauk mai. Ró ne’e rasik iha kapasidade atu tula ema na’in-377 no karreta hamutuk 15.

Prosesu kontrusaun Ró Haksolok ninia kontratu asina iha 2014 entre Governu no empreza portugués. Konstrusaun ró ne’e konsege paradu maibé bainhira estabelese Zona Espesiál Ekonomia Sosiál Merkadu (ZEESM), prosesu kontrusaun ró-ahí ne’e entrega ba Autoridade mak responsabiliza.

Ferry Ró Haksolok, desizaun atu hili ninia estaleiru (fatin atu harii ró) hahú no foti husi V Governo Konstitusionál ne’ebé lidera Kay Rala Xanana Gusmão nu’udar Primeiru-Ministru, tuir ninia reprezentasaun husi Ministru Transporte no Komunikasaun, Pedro Lay da Silva, ne’ebé selebra kontratu ho estaleiro Atlantic Eagle Ship Building Lda. (Atlanticeagle) iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu husi Governu Timor-Leste ba Autoridade RAEOA-ZEESM hodi transfere poder no alokasaun verba ne’ebé akontese liu tiha akordu entre Governu no EstaleiruAtlantic Eagle no liu estaleiru hodi hahú harii ró.

Atu garante implementasaun tuir espesifikasaun no padraun tékniku ba Ferry Ró Haksolok no assegura katak ró ne’e bele hetan rejistu internasional (Registo Internacional de Navios da Madeira em Portugal) tuir rekezitu Governu Timor-Leste, RAEOA-ZEESM selebra kontratu supervizaun ba konstrusaun ferry ho Instituto de Soldadura e Qualidade (ISQ), ne’ebé hanesan instituisaun ho esperiénsia liu tinan 50 ho konstrusaun ne’ebé kredensiál atu fiskaliza konstrusaun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here