Primeiru-Ministru, Taur Matan Ruak, hamutuk ho ninia membru sira iha Parlamentu Nasionál (PN), ohin, iha sesaun plenária hodi debate proposta Orsamentu Jerál Estadu 2020. Imajen/ Egas Cristovão.

DILI, 12 dezembru 2019 (TATOLI)—VIII Governu Konstitusionál seidauk bele submete proposta lei orsamentu jerál Estadu (OJE) 2020 ba Parlamentu Nasionál (PN), aban (13/12). Governu sei submete iha 19 dezembru mai ne’e.

“Dadeer ne’e ha’u simu ona karta hosi Primeiru-Ministru, Taur Matan Ruak, iha ne’ebé husu para Governu labele kumpre tempu ne’ebé mak Primeiru-Ministru rasik mak deklara iha plenária momentu ne’ebá katak aban sei lori filafali proposta orsamentu mai,” Prezidente Parlamentu Nasionál, Arão Noé de Jesus da Costa Amaral ba jornalista iha salaun Lalini Larigutu, Caicoli, kinta ne’e.

Nia haktuir, razaun Governu nian hodi adia aprezentasaun proposta lei OJE refere tanba sei armoniza ka halo ajustamentu.
“Hanoin ida-ne’e tarde uitoan maibé sei la fó impaktu tanba prosesu hotu sei la’o hela. Ami fiar katak iha janeiru 2020 nia rohan ita aprova ona orsamentu 2020 nian,” Arão garante.

Antes ne’e, hafoin Oitavu Governu Konstitusionál deside pondera (dada hikas) proposta orsamentu jerál Estadu 2020, Primeiru-Ministru Taur Matan Ruak promete aprezenta hikasfali iha 13 dezembru tinan ne’e.

“Ami sei hatama filafali proposta lei OJE 2020 iha 13 dezembru. Ita iha tempu natoon atu halo diskusaun iha jeneralidade no espesialidade”, Xefe Ezekutivu afirma iha plenária Parlamentu Nasionál, 3 dezembru liubá.

Jornalista: Hortençio Sanchez
Editór: Xisto Freitas

HAKEREK NO HATÁN

Please enter your comment!
Please enter your name here