Prezidente Tribunál Rekursu, Deolindo dos Santos. Imajen/Tatoli

DILI, 11 dezembru 2019 (TATOLI)–Durante tinan 2019, Tribunál iha prosesu kazu krime hamutuk 376 no juíz sira redús liuhusi deside ona kazu atusrua (200) resin. 

Novidade ne’e, Prezidente Tribunál Rekursu (PTR), Deolindo dos Santos hato’o ba Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, kuarta ne’e.

“Ha’u hateten ba Prezidente Repúblika katak Tribunál Rekursu maski seidauk perfeitu liu, maibé kuaze la’o normál ona, tanba iha tinan ne’e totál prosesu krime hamutuk 376. To’o ohin, juíz sira deside ona kazu atusrua-resin, no iha de’it krime pendente hamutuk 92”, Deolindo ba jornalista sira hafoin enkontru ho Xefe Estadu.

Deolindo hatutan, kona-ba kazu sivíl, iha tinan ne’e Tribunál iha totál prosesu hamutuk 91 no Tribunál rasik iha ona desizaun ne’ebé sai ona hamutuk 70 resin, hela de’it 18 mak pendente.

Maski nune’e, nia fiar katak sei iha posibilidade atu bele redús tan númeru kazu hirak-ne’e iha fulan dezembru nia rohan.

“Ida-ne’e iha posibilidade atu iha fulan ne’e nia rohan bele tun tan, tanba sei iha tan deliberasaun dala tolu iha loron 12, 19 no loron 26 fulan ne’e. Ho ida-ne’e, prosesu balun sei bele tun tan no númeru kazu pendente sira ne’e bele hamenus”, nia fiar.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here