Lia-na’in Munisípiu Lautem, Felix Correia "Ze Pokilo". Imajen/Tatoli.

LAUTEM, 11 dezembru 2019 (TATOLI) – Lia-na’in Munisípiu Lautem, Felix Correia “Ze-Pokilo”, husu ba Lautem-oan sira atu prezerva uma-lisan (casa típica) no tais hodi hatutan ba jerasaun foun sira.

“Ita presiza halo duni uma-lisan no tais ho orijinalidade atu ita hatudu nafatin ita-nia identidade Lautem ba Timor-Leste no ba mundu, tanba tempu agora uma-lisan mós ema ladún preokupa, balun monu ona no kuaze atu laiha ona”, katak nia ba Ajénsia TATOLI iha rezidénsia Mehara, ohin.

Felix Correia “Ze- Pokilo” friza hahú husi bei-ala Lautem-oan sira fiar maromak no uma-lisan, tais no fatuk no ai-lulik tanba liuhusi dalan ne’e maka hadomi no fiar malu.

“Ita-nia kultura liuhosi uma-lisan maka ita fiar malu no hadomi malu hodi kontribui no dezenvolve família, Lautem no nasaun Timor-Leste”, katak.

Nune’e, nia enkoraja ba Lautem-oan sira atu kontinua konstrui uma-adat no halo tais orijinál ne’ebé uza kabas (Kai-sala, iha lian fataluku) ho orijinál hodi kontinua kaer metin identidade Lautem-oan sira-nian.

Nia rekomenda ba Governu atu fó apoia finanseira ba Lautem-oan sira bele harii uma-lisan hodi kontinua hatudu identidade ba mundu.

Atu tais Lautem-oan labele lakon nia orijinalidade, Ze-Pokilo sujere atu kria kooperativa hodi husu finanseiru ba Governu hodi kuda kabas barak liután.

“Ita observa Lautem-oan la fó importánsia ba uma-lisan no tais sira tanba iha tempu modernu ona, ida ne’e hatudu situasaun ne’ebé la fiar malu”, kestiona.

Nia husu nafatin Lautem-oan atu kesi metin relasaun família uma-lisan, fetosaa no umane nu’udar símbolu unidade iha rai ida-ne’e hodi bele simu malu, respeita malu nu’udar família boot iha uma ida, knua ida no rai ida hodi sira bele moris ho pás ba objetivu armonizasaun sosiál iha futuru.

Administrativamente Munisípiu Lautem kompostu husi postu administrativu lima hanesan, Lospalos, Luro, Iliomar, Tutuala no Lautem, ne’ebé fahe ba suku 34 ho aldeia hamutuk 151, ho luan kilómetru kuadradu 1,813.11 no totál populasaun 15.564.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here