Diretór ESJ 5 de Maio, Manuel Verdial. Foto Fontes

Ba inan-aman sira lalika laran taridu ho osan ne’ebé fó mai eskola osan sira ne’e asegura hela iha banku hodi prepara ba mehi ne’ebé iha

DILI, 11 dezembru 2019 (TATOLI)–Komisaun Anti Korupsaun (KAK) investiga Diretór Eskola Sekundária Jerál (ESG) 5 de Maio, Becora, Manuel Verdial tanba konstrusaun sala-de-aula rua, iha estabelesimentu ensinu ne´e rasik.

“Ha’u rekoñese fraku iha administrassun tanba ne’e mak ekipa sira tun ba haree konstrusaun fizíka iha maibé administrasaun mak ha’u la hatudu fali tanba ne´e mak sira (KAK) deskonfia ha´u,” dehan Diretór Manuel Verdial iha Edifísiu Minisrériu Edukasaun, Juventude no Desportu (MEJD), ohin.

Tanba ne´e, tuir manorin na´in ne´e katak ESG 5 de Maio nia konstrusaun fízika ba sala-de-aula rua labele la´o hahú kedan iha fulan jullu depois simu notifikasaun husi KAK, depois ba fali Funsaun Públika no inspesaun nasionál hodi justifika.

“Agora prosesu la´o hela maibé konstrusaun mak tenke paradu. Lolos ne’e, kuandu laiha problema oras ne’e bele taka ona kakuluk”.

Nia haktuir, fundu ba konstrusaun sala-de-aula rua ne´e mai husi kontribuisaun inan-aman estudante sira nian, ne´ebé kada fulan sira kontribui dolár ida. Osan sira ne´e eskola hatama iha banku no oras ne´e iha ona rihun sia.

Prosesu la´o ona maibé rezultadu investigasaun mak seidauk anunsia. Tanba ne´e, Diretór Eskola, Manuel Verdial espera buat hotu la´o di´ak. Jestaun administrasaun mak la iha maibé interrese hakarak serbisu tanba ne´e mak hakarak aselera konstrusaun ne´e.

“Ba inan-aman sira lalika laran taridu ho osan ne’ebé fó mai eskola osan sira ne’e asegura hela iha banku hodi prepara ba mehi ne’ebé iha”.

Jornalista        : Tomé Amado

Editór              : Rafy Belo

HAKEREK NO HATÁN

Please enter your comment!
Please enter your name here