Pesoál Alfándega halo hela pasa revista ba vizitante sira ne’ebé tama-sai iha Fronteira Batugadé. Imajen/Alex Santos.

DILI, 11 dezembru 2019 (TATOLI) – Diretór Nasionál Operasaun Autoridade Aduaneira (AA/Alfándega), Julião José Ximenes, hateten Alfándega koordena ona ho lojístika nasionál Ministériu Finansas no kompañia atu halo manutensaun ba jeradór ne’ebé avaria iha postu integradu Batugadé.

“Ami kontaktu ona ho lojístika nasionál Ministériu Finansa no sira koordena ona ho parte kompañia ne’ebé halo manutensaun ba jeradór ne’e, talvés ohin, sira arranka ona”, Julião dehan ba Ajénsia TATOLI iha área Palásiu Governu, kuarta ne’e.

Hodi hatutan ahi ne’ebé mate iha fronteira, hosi parte Alfándega simu informasaun katak ne’e la’ós semana rua, maibé loron rua.

“Tanba ne’e maka ami-nia kolega sira ne’ebé maka servisu iha fronteira Batugadé halo servisu ho manuál “, dehan Julião.

Nia realsa bá oin atu prevene kestaun ida ne’e labele akontese, Alfándega husu ba Ministériu Finansas buka ona empreza definitivamente ba manutensaun jeradór nune’e bainhira jeradór avaria bele fó atendimentu lalais.

“Alfándega sei sujere ba Ministériu Finansa atubele hili kompañia definitiva, nune’e karik iha jeradór avaria iha postu integradu Fronteira Batugadé bele funsiona normalmente”, nia afirma.

Julião salienta kuaze loron rua ekipa AA halo pasa revista ba sasán ho manuál, la ho automátika no daudaun ekipa sira hamutuk ho kompañia bá halo manutensaun no espera bele rezolve jeradór, nune’e iha loron boot Natál bele halo servisu kontrolu ba movimentu iha fronteira ho di’ak liután.

Xefe Postu Servisu Imigrasaun  Fronteira Batugadé, Sarjentu Xefe Polísia Moises Barros, hato’o preokupasaun ba jornalista Ajénsia TATOLI, segunda (09/12), Postu Administrativu Batugadé Munisípiu Bobonaro katak ho kestaun ahi mate-lakan, afeta ba sira-nia servisu.

Tanba imigrasaun servisu ho sistema jestaun fronteira ka border management system, tanba ne’e, bainhira akontese eletrisidade mate,  sistema labele rejista sidadaun sira ne’ebé tama no sai iha área fronteira.

Daudaun ne’e, Servisu Migrasaun labele rejista eletrónika, maibé taka de’it karimbu ho manuál ba pasaporte vizitante rai-laran no estranjeiru.

“Bainhira la rejista iha sistema, entaun iha tempu ruma Autoridade sira hosi Ministériu Justisa buka tuir sidadaun balun ne’ebé komete krime, ami labele buka tuir tanba agora daudaun ami atende ho manuál”, Polísia Moises Barros katak foin lalais ne’e.

Sarjentu Xefe Polísia ne’e hatutan problema ne’e afeta mós ba pesoál sira  hodi fó atendimentu ida ho lais no rigór ba ema barak.

“Ahi mate komesa domingu (08/10) to’o ohin (segunda 09/12) ami-nia telefone mós agora labele karrega, entaun ami sei labele kontrola ema tama sai ho di’ak no másima”, informa.

Polisia Imigrasaun destaka nia pesoál hamutuk na’in-neen iha Postu Fronteira Batugadé no pesoál AA iha na’in-24.

Diretór AA Munisípiu Bobonaro, Alberto Seixas, hatutan karreta tula sasán barak maka para hela, labele rekolla taxa, tanba sistema lala’o no paradu totál.

Atu solusiona problema ne’e, nia sujere ba Governu liuhosi Ministériu Obra Publika (MOP) atu koordena ho Eletrisidade Timor-Leste (EDTL, sigla portugés) hodi fó atensaun séria ba problema ne’e ho lalais.

“Ami-nia pesoál sira revista de’it manuál, ita labele deteta saida de’it maka iha ema nia pasta laran, maibé kuandu ita uza sistema eletróniku bele indika sasán sira iha laran”, afirma.

Aléinde ne’e, karreta tula sasán importasaun husi Atambua no Kupang-Indonézia barak para  iha postu Mota-ain durante loron-rua ona tanba ekipa servisu Aduaneira labele pasa revista ho sistema manuál hodi kobra taxa ba kofre Estadu.

Notísia relevante : Mákina Raiu-xís iha Motain Avaria Besik Tinan Ona

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here