Diretór Nasionál Metrolojia no Jeofízika, Terencio Fernandes Moniz. Imajen Tatoli/Antónia Gusmão.

DILI, 11 dezembru 2019 (TATOLI) – Diresaun Nasionál Metrolojia no Jeofízika (DNMG) sei falta ekipamentu hodi deteta direta temperatura. Tanba ne’e maka durante ne’e DNMG halo previzaun de’it.

“Ekipamentu ne’e maka sai obstákulu ba ami tanba durante informasaun ne’e barak liu uza data satélite no hosi modelu nasaun sira seluk fó mai ami, ne’e tanba kooperasaun ho parseiru sira”, Diretór Nasionál Metrolojia no Jeofízika, Terencio Fernandes Moniz, ba TATOLI iha nia knaar fatin Kaikoli, ohin.

Hodi hatutan, daudaun DNMG koopera ona ho Organizasaun Metrolojia Mundiál, Metrolojia Austrália, Badan Meteorologi, Klimatologi, dan Geofisika (BMKG) Indonézia, no Regional Integrated Multi-hazard Early Warning System (RIMES) hosi Bangkok.

 “Informasaun sira ne’e sira fó mai”, Terencio afirma.

Aléinde ne’e, DNMG mós asesu ba website sira ne’ebé maka sira fó para analiza kondisaun tempu ho klima ne’ebé asesu hosi sira-nia website no interpreta mai kedas iha Timor-Leste nian no informa ba komunidade.

Terencio afirma, iha tempu reál ka haree direta maka sei preokupadu tanba ekipamentu ne’ebé uza hodi haree hanesan ohin loron hakarak haree temperatura aas ne’e, se lae fó previzaun de’it hanesa temperatura célsius 35, maibé kuandu real time ne’e sei la to’o 35 maibé sei to’o de’it 34-32.

“Ekipamentu ne’e laiha maka DNMG uza de’it data satellite no modelu, kuandu ekipamentu real time ne’e iha di’ak liután, ezemplu udan, entaun ninia aas ne’e hira ona, hosi ida ne’e ami bele alerta ona ba populasaun atu atensaun, maibé ekipamentu ne’e só iha de’it kapitál ne’ebé tau iha aeroportu”, afirma.

Aléinde ne’e, materiál ba monitorizasaun informasaun seidauk kompletu. “Espera katak ajuda sei mai barak nune’e ami fó informasaun ho responsabilidade no kualidade. Rekursu umanu mós sei menus tebes presiza atu aumenta”.

Entretantu, atividade DNMG nian maka oinsá prepara dadus, analiza dadus no fornese informasaun ba públiku liuhosi kanál sira hanesan mídia, Protesaun Sivíl iha munisípiu.

“Objetivu hosi ne’e atu prevene labele hetan dezastre ruma, informasaun ne’ebé ami fó antes akontese, hanesan área sira ne’ebé poténsia akontese rai monu, mota bele sobu no sira hela besik tasi, entaun hosi informasaun ami fó bele antesipa nanis”, katak.

Funsionáriu DNMG hamutuk 30 kompostu husi permanente na’in-17 no kontratadu 13. Hirak ne’e inklui ona funsionáriu sira ne’ebé destakadu iha munisípiu sira.

DNMG Apela sei Akontese Udan Mai ho Anin iha Semana Oin

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here