Premiadu Prémiu "Sérgio Vieira de Melo" 2019 na'in-lima, hasai foto hamutuk ho Prezidente Repúblika no Espoza, hafoin serimónia atribuisaun prémiu. Imajen Mídia PR

DILI, 10 dezembru 2019 (TATOLI)–Xefe Estadu, Francisco Guterres Lú Olo, husu ba manán-na’in sira Prémiu Direitu Umanu “Sergio Vieira de Melo”, iha tinan ne’e, atu kontinua hala’o atividade ne’ebé liga ho promosaun direitu umanu iha Timor-Leste (TL). 

“Parabéns ba manán-na’in sira no imi-nia família ne’ebé simu no apoia ita-boot sira-nia dedikasaun tomak ba direitu umanu, ho dalan oioin. Ha’u husu atu imi kontinua nafatin atividade sira ligadu ho promosaun, protesaun no divulgasaun direitu umanu iha Timor-Leste”, Xefe Estadu husu liuhusi diskursu durante distribuisaun prémiu ba manán-na’in sira iha salaun Xina, Palásiu Prezidente Nicolau Lobato, Bairru Pité, Dili, ohin.

Aman nasaun ne’e fó atensaun katak manán ona Prémiu Direitu Umanu ida-ne’e la signifika katak bele para ona ho atividade iha ámbitu direitu umanu.

“Bainhira sei iha ema iha mundu ne’e, serbisu kona-ba promosaun, protesaun no divulgasaun direitu umanu eziste nafatin no sempre iha dezafiu oioin. Tan ne’e, ha’u espera katak prémiu ida-ne’e sai nu’udár fatór ida tan, ne’ebé motiva no enkoraja liután manán-na’in sira atu hatudu liután ativizmu iha área direitu umanu”, PR Lú Olo fó hanoin.

Prezidente Repúblika (PR) hato’o mós agradesimentu ba Konsellu Agrasiamentu no Órden Onorífika ne’ebé fó ona apoiu durante prosesu selesaun ba kandidatu sira.

Tanba ne’e, husu kandidatu sira-ne’ebé mak la sai manán-na’in iha tinan ida-ne’e tenke kontínua hatudu nafatin vontade iha prosesu promosaun, protesaun no divulgasaun direitu umanu iha rai ne’e.

Lee mós: Individu 3 no Organizasaun 3 Simu Prémiu Sérgio Vieira de Mello

Durante diskursu, Xefe Estadu sita katak tinan-tinan iha loron 10 fulan-dezembru, ema iha mundu tomak selebra Loron Internasionál Direitu Umanu, no loron ne’e duni sai nu’udàr loron Internasionál ba Direitu Umanu, tanba iha loron ne’e, iha tinan 1948, Asembleia Jerál Organizasaun Nasaun Unida aprova Deklarasaun Universál Direitu Umanu.

Prezidente Repúblika hatutan katak deklarasaun Universál ne’e sai nu’udàr matadalan ba direitu oioin ema moris nian, ne’ebé mak tenke hetan protesaun ho respeitu no nasaun sira hotu iha mundu tomak konsagra direitu oioin ne’ebé temi iha Deklarasaun Universál ne’e nia laran iha sira-nia lejizlasaun nasionál.

“Liuhusi inisiativa husi ha’u-nia belun di’ak Ramos-Horta, hahú hosi tinan 2008, iha loron 10 fulan-dezembru tinan-tinan, Prezidente Repúblika entrega Prémiu Direitu Umanu Sérgio Vieira de Mello ba sidadaun Timor-Leste ka ba ema estranjeiru, ka ba organizasaun governamentál ka la’ós governamentál, kona-ba promosaun, protesaun no divulgasaun Direitu Umanu iha Timor-Leste. Tinan 2019 ne’e hamutuk tinan ba dala sanulu-resin ida ona mak ita realiza atribuisaun Prémiu ne’e ba indivídu ka organizasaun sira-ne’ebé mak hatudu ona rezultadu serbisu ho susesu iha prosesu promosaun, protesaun no divulgasaun Direitu Umanu iha ita-nia rai doben ne’e”, Lú Olo subliña.

PR Lu Olo mós fó hanoin katak Timor-Leste nia belun saudozu Sérgio Vieira de Mello dedika nia moris tomak ba kauza direitu umanu no pás. Nune’e, iha tinan ida ne’e, Timor-Leste selebra tinan ruanulu ba Referendu, hanoin hikas saudozu Sérgio Vieira de Mello, ema ida ho karater umanista, ho kapasidade diálogu no negosiasaun ne’ebé sempre defende direitu umanu no valór demokrátiku sira, nu’udár inspirasaun ida ba timoroan hotu.

Prémiu ne’e fahe ba kategoria rua:

Prezidente Repúblika mós esplika katak iha prémiu ne’e fahe ba kategoria rua mak hanesan Direitu Sivíl no Polítiku ne’ebé konsidera ema ka instituisaun, ka organizasaun ne’ebé promove, defende no divulga direitu umanu ne’ebé rekoñese iha mundu tomak iha ámbitu direitu sivíl no direitu polítiku nian; no Direitu Ekonómiku, Sosiál no kultura, ne’ebé konsidera ema ka instituisaun ka organizasaun ne’ebé hala’o atividade atu promove, defende no divulga direitu umanu iha área direitu sosiál, direitu ekonómiku no direitu kulturál, liuliu kombate ki’ak, dezenvolve setór edukasaun, saúde, protesaun meiu-ambiente no solidariedade sosiál.

PR Lu Olo fó hanoin tan katak, iha tinan 2019, totál hamutuk iha kandidatu na’in-85 (ualunulu resin-lima). Kandidatu ba kategoria Direitu Sivíl no Polítiku hamutuk na’in-16 (sanulu resin-neen). Kandidatu ba kategoria Direitu Ekonómiku, Sosiál no Kultura hamutuk na’in-69 (neennulu resin-sia).

Liuhosi prosesu selesaun, PR Lu Olo hatutan, to’o ikus hetan manán-na’in hamutuk 5 (lima). Indivídu na’in-4 (haat) no organizasaun naun-governamentál ida. Iha kategoria Direitu Sosiál, Ekonómiku no Kulturál, manán-na’in sira mak José Amaral Guterres, Marcelina dos Santos da Cruz no Organizasaun Konservasaun Flora & Fauna. Iha kategoria Direitu Sivíl no Politininiaku, manán-na’in sira mak José Luís de Oliveira ho Virgílio da Silva Guterres “Lamukan”.

“Manán-na’in 5 (lima) ne’e ohin mai marka prezensa iha ita-nia oin hodi simu prémiu ba atividade hirak-ne’ebé mak merese duni hetan prémiu ne’e. Ita sira iha ne’e sai testemuña ba sira”, Lú Olo tenik.

Iha diskursu ne’e, PR Lu Olo temi ida-idak ninia atividade ne’ebé bele sai manán-na’in, mak hanesan José Amaral Guterres, durante tinan barak hala’o knaar nu’udár profesór iha área remota sira iha Postu Administrativu Ossu, Munisípiu Viqueque. Nia tau atensaun boot ba labarik sira-ne’ebé hala’o estudu iha ensinu báziku iha área remota sira, fó motivasaun no enkoraja família sira atu dudu oan sira badinas bá eskola.

Profesór ne’e kontribui esforsu boot iha prosesu harii eskola ba labarik sira. Distánsia ne’ebé dook la sai impedimentu ba sidadaun ne’e atu hala’o ninia knaar. Profesór José Amaral Guterres hatudu ona espíritu voluntarizmu. Dala barak nia tenke hasai ninia rekursu rasik hodi konkretiza mehi atu fó edukasaun ba labarik sira.

Marcelina dos Santos da Cruz, profesora ensinu pré-primáriu no primáriu ne’ebé mak durante dékada ida resin hala’o ninia knaar ho voluntarizmu de’it iha eskola oioin. Oras ne’e, nia kontínua hala’o ninia atividade hanorin ho volutarizmu iha Munisípiu Liquiçá. Profesora Marcelina dos Santos da Cruz la baruk kontinua fó ninia kontributu ba setór edukasaun maski laiha saláriu. Distánsia ne’ebé dook la impede profesora ne’e atu ajuda harii labarik sira-nia kapasidade.

Profesora Marcelina dos Santos da Cruz ninia saláriu mak dadeer rona kumprimentu ‘bom dia’ no lokraik rona kumprimentu ‘boa tarde’ hosi ninia alunu sira. Prezidente Repúblika laiha liafuan atu hato’o agradesimentu ba Profesora Marcelina nia dedikasaun tomak ba labarik sira, ne’ebé reprezenta nasaun nia futuru.

Organizasaun nasionál Konservasaun Flora & Fauna halo ona esforsu maka’as iha ámbitu protesaun no konservasaun flora no fauna liuhosi espíritu voluntarizmu no dedikasaun tomak husi nia membru sira, ne’ebé sai ezemplu furak ida kona-ba hadomi natureza. Ambiente flora no fauna ne’ebé di’ak fó mós moris di’ak ba ema, inklui iha aspetu sósiu-ekonómiku.

Bainhira ema la tau atensaun didi’ak ba ambiente flora no fauna, ema bele hetan problema. Ho pensamentu ida-ne’e mak organizasaun flora no fauna hala’o ona atividade oioin iha fatin oioin ne’ebé proteje no konserva ambiente flora no fauna, inklui protesaun no konservasaun ba ai-parapa, korál (ahu-ruin) no kuidadu ba ambiente tasi.

José Luís de Oliveira hala’o serbisu iha área direitu umanu durante tinan barak ona. Sidadaun ne’e fó ona prova katak nia iha duni konsisténsia iha ninia hahalok sira. Durante tinan barak nia la muda ninia atividade sai hosi área direitu umanu.

José Luís de Oliveira harii no hola parte iha organizasaun oioin ne’ebé mak hala’o knaar iha área direitu umanu. Organizasaun sosiedade sivíl sira promove no estimula sidadania ida-ne’ebé ativa nu’udar kondisaun ‘sine qua non’ ba demokrasia. Ativista direitu umanu ida-ne’e dala barak hatudu korajen hodi ko’alia defende buat ne’ebé mak nia sente katak loos no justu.

Virgílio da Silva Guterres “Lamukan” durante tinan barak kontribui ba prosesu atu hamosu sosiedade iha ne’ebé iha respeitu ba direitu umanu, liuliu direitu iha área jornalizmu. Ho korajen, sidadaun ida-ne’e defende liberdade espresaun, la’ós de’it ba jornalista sira, maibé mós ba ema hotu-hotu. Virgílio da Silva Guterres luta nafatin ba imprensa ida-ne’ebé livre iha Timor-Leste no defende mós direitu sidadaun sira-nian ba informasaun.

Virgílio Lamukan komprende knaar importante ne’ebé komunikasaun sosiál ida livre, responsável no independente iha ba sosiedade demokrátika ida. Sidadaun ne’e mós hatudu ona ninia ativizmu iha prosesu protesaun no prezervasaun ba meiu-ambiente.

Prémiu ne’e eentrega direta husi Prezidente Repúblika, Francisco Guterres Lú Olo, no marka prezensa husi Espoza, Prezidente Tribunál Rekursu, eis Primeiru Ministru, Marí Bim Amude Alkatiri, membru Governu balun, deputadu balun, sosiedade sivíl no família premiadu sira.

Jornalista: Cipriano Colo

Editór: Xisto Freitas

 

 

HAKEREK NO HATÁN

Please enter your comment!
Please enter your name here