Ministru Agrikultura no Peska Joaquim José Gusmão dos Reis Martins no Vise-Ministru Negósiu Estranjeiru no Relasaun Esteriór, Ruben Dario Molina. Imajen/Mídia MAP.

DILI, 10 dezembru 2019 (TATOLI) – Ministru Agrikultura no Peska Joaquim José Gusmão dos Reis Martins, informa Governu Venezuela hato’o nia prontidaun atu apoia Ministériu Agrikultura no Peska (MAP) iha área tolu mak hanesan peskiza, peska, no agrikultura.

Vontade Venezuela nian ne’e hato’o hosi Vise-Ministru Negósiu Estranjeiru, Ruben Dario Molina, bainhira iha vizita traballu mai Timor-Leste.

“Ohin, iha vizita traballu ida iha MAP hosi Vise-Ministru Negósiu Estranjeiru Venezuela, sira oferese ba ita atubele haruka ita-nian staff tékniku sira bele bá aprende iha sira-nian sentru peskiza ne’ebé maka moderna iha Venezuela”, Ministru Joaquim ba Ajénsia TATOLI iha Comoro, ohin.

Governante ne’e hatutan ba parte peskiza nian, Timor-Leste agresivu uitoan tanba atu susesu iha agrikultura ne’e, presiza peskiza barak hodi hetan variedade produtu sira ne’ebé maka iha ona atubele adapta.

Aléinde ne’e, ko’alia mós setór agrikultura no peska nian, oinsá mak bele haruka tékniku sira husi Venezuela bele mai iha Timór hodi ajuda iha área rua ne’e.

“Sira husu ba ita atu haruka ita-nian ema bá eskola iha Universidade Marítima. Universidade ne’e estuda kle’an kona-ba oinsá lori ró, tanba ne’e ita iha interese atu haruka ita-nian ema sira estuda iha universidade ida ne’e”, Ministru Joaquim dehan.

Ba oportunidade ida ne’e, Ministru Agrikultura no Peska dehan sei halo planu ida ba peskiza, agrikultura, no peska hodi aprezenta ba Ministru Negósiu Estranjeiru hodi bele prepara akordu konjunta ida para bele asina.

“Sira (Venezuela) husu ba ita atu koopera hamutuk ho ita-nian Ministru Negósiu Estranjeiru atu prepara MoU ba ida ne’e, atu MAP bele asina ho sira nune’e bele haruka ona ita-nian ema bá estuda iha Venezuela”, ministru afirma.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here