Korpu Bombeiru ho apoia husi komunidade sira halo intervnesaun hamate ahi ne'ebé han motuk kioske hamutuk 100-resin iha antiga Merkadu Comoro, Dili, 9 Dezembru 2019. Imajen/Antonio Goncalves

DILI,10 dezembru 2019 (TATOLI)-Governu liuhosi Sekretáriu Estadu Protesaun Sivíl (SEPS) iha segunda (09/12) distribui ona apoiu emerjénsia ba vítima inséndiu hamutuk uma kain 79 iha antiga Merkadu Comoro Aldeia 05, Suku Fatuhada, Postu Administrativu Dom Aleixo Munisípiu Dili.

Sekretáriu Estadu,  Alexandrino Xavier de Araújo, relata apoiu  ho tipu emerjénsia ne’e hanesan hahan supermi, mina, foos,  no la’os hahan maka lona, sanan, bikan, kanuru no seluktan.

Notísia Relevante:Ahi Han Kioske 100-resin iha Antiga Merkadu Comoro

“Horseik lokraik Governu halo ona  Intervensaun  hodi apoiu emerjénsia ba vítima sira,”informa, SEPS, ba TATOLI iha ninia servisu fatin Caicoli, tersa ohin.

Tuir relatóriu verifikasaun dadus provizóriu husi Governu no autoridade lokál rejista kioske no  komunidade nia uma hamutuk 79 maka ahi han iha segunda, horiseik.

Mezmu iha ona dadus provizóriu,  maibé ekipa SEPS hamutuk ho autoridade lokál sei kontinua halo verifikasaun hodi identifika loloos sasan ne’ebé hetan estragus iha akontesimentu ne’e.

“Kona-ba apoiu rekoperasaun ba uma,  ida  ne’e sei koordena ho Munisípiu Dili tanba antes ne’e Munisípiu Dili fó sai ona atu komunidade sira hamamuk fatin refere hodi labele hela,”Nia hateten.

Jornalista:Nelson de Sousa

Editór   :Francisco Simões

HAKEREK NO HATÁN

Please enter your comment!
Please enter your name here