Pouzada Tutuala/Imajen Tatoli.

LAUTEM, 10 dezembru 2019 (TATOLI) – Jerente Pouzada Tutuala, Munisípiu Lautem, Nicolau dos Santos, informa reseita pouzada iha tinan ne’e tun, maizumenus $8000 ka $9000 kompara 2018 ho totál retornu hamutuk rihun $13.

“Iha tinan ne’e reseita tun liu kompara ho 2018 ne’ebé rekolla to’o rihun $13, tanba turista sira ladún vizita ho kestaun infraestrutura, liuliu estrada ladún di’ak”, Nicolau ba Ajénsia TATOLI iha Pouzada Tutuala, ohin.

Jerente Pouzada Tutuala, Nicolau dos Santos/Imajen Tatoli.

Tuir dadus, iha tinan ne’e, turista sira hosi Austrália, Portugál, Inglaterra no Alemaña maka vizita poténsia turístiku iha Tutuala-Jaco, maski vizitante lahanesan uluk ka númeru tun.

Aleinde ne’e, pouzada iha nia infraestrutura bázika hanesan ekipamentu no jardín atu hadi’a maibé orsamentu la sufisiente.

“Ami atu kuda ai-funan ruma no hadi’a’ jardín mós labele halo tanba lutu laiha, ami hanoin halo lutu maibé laiha kbiit ka laiha orsamentu”, preokupa.

Maski nune’e, Empreza Tango Alfa ne’ebé jere Pouzada Tutuala hato’o ona proposta ba Governu iha tinan kotuk liubá, maibé to’o agora seidauk iha resposta.

Pouzada Tutuala iha kuartu neen, rua ba kuarta kazál nian ho kada presu $50 no kuartu solteiru iha haat ba kada kuartu ho folin $20.

Pouzada Tutuala kaer hosi Empreza Tango Alfa Unipessoal, Lda, asina kontratu ho Ministériu Turizmu iha 2014 to’o 2019. Pouzada ne’e iha empregadu na’in-tolu ne’ebé kontrata hosi empreza hodi fó atendimentu ba turista.

Jornalista : Florencio Miranda Ximenes 

Editora : Maria Auxiliadora

HAKEREK NO HATÁN

Please enter your comment!
Please enter your name here