Prezidente Repúblika, Francisco Guterres Lú Olo, entrega prémiu Direitu Umanu "Sergio Vieira de Mello" kategoria Direitu Sivíl no Polítiku ba manan-na'in, Virgílio da Silva Guterres 'Lamukan'. Imajen/Mídia PR

DILI, 10 dezembru 2019 (TATOLI)–Virgílio da Silva Guterres ‘Lamukan’, ne’ebé sai mós hanesan manan-na’in ida ba Prémiu Direitu Umanu “Sérgio Vieira de Mello” iha tinan ne’e ba kategoria Direitu Sivíl no Polítiku, konsidera prémiu ne’ebé nia hanesan sikote ida-ne’ebé ‘hikis’ no haka’as atu kontinua konsentra liután no fó an ba serbisu iha mundu jornalizmu.

“Estadu ninia obrigasaun maka fó rekoñesimentu no buka valoriza buat ne’ebé sidadaun sira halo. Ba kestaun ne’e ha’u sente onradu tebes bainhira hetan prémiu ida-ne’e. Ha’u hein katak prémiu ne’e la’ós sai pontu finál ba ha’u nia esforsu, maibé hanesan sikote ida tan atu haka’as no hikis ha’u hodi kontinua konsentra no fó dedikasaun maka’as liután iha mundu jornalizmu”, tenik Virgílio ba Agência TATOLI, hafoin simu prémiu iha Palásiu Prezidensiál, Bairru Pité, tersa ne’e.

Atuál Prezidente Konsellu Imprensa ne’e dehan, nia parte hakarak konsentra no dedika-an liután atu haree profisionál jornalista sira no husu nafatin ba profisionál mídia sira hodi hasa’e sira-nia kapasidade profisionál atu kontinua fó informasaun ne’ebé ho kualidade ba povu.

Nia hatutan, iha konsentrasaun ne’e sei husu ba polítiku no governante sira atu respeita direitu ba sidadaun nian atu espresa sira-nia krítika tanba bainhira polítiku sira halo buat ruma la loos, sidadaun sira iha liberdade tomak atu hato’o krítika.

Iha impresaun, Virgílio hateten, nia nunka iha hanoin atu manán Prémiu Direitu Umanu, maibé dezde dahuluk hahú hala’o profisaun hanesan jornalista, nia hadomi loos serbisu ne’e.

“Ha’u sente katak iha ha’u nia profisaun hakerek ne’e, hola parte hanesan meiu ida atu espresa ha’u-nia frustrasaun. Entaun, ha’u nunka hanoin katak ha’u serbisu atu aban bainrua hetan prémiu. Tanba ne’e, atribuisaun sira-ne’e hanesan surpreza boot ida, sente ondradu, tanba iha rekoñesimentu husi Estadu ba serbisu ne’ebé ha’u halo”, nia espresa.

Ba Virgílio, hetan prémiu hanesan rekoñesimentu ida ba profisaun ne’ebé mak nia hala’o no hadomi tebes.

Nia dehan, buat ne’ebé Estadu tenke halo mak oinsá atu ema-nia espresaun no liberdade la prejudika ema seluk ninia liberdade, ema nia onra, no ema nia dignidade, tanba ne’e Estadu tenke iha intervensaun hodi hamosu regulamentu sira-ne’ebé garante profisaun ba ema seluk.

Virgílio haktuir, nia hahú inklina-an iha vida jornalizmu hafoin sai hosi kadeia iha tinan 1984 no iha tempu barak nia laran uza hodi ko’alia ho estudante timoroan sira oinsá hanoin kona-ba liberdade ba Timór.

“Entaun, ha’u hanoin katak liberdade espresaun iha mundu jornalizmu hanesan aspetu importante ida-ne’ebé la’ós de’it iha sosiedade demokrátiku maibé mós iha dezenvolvimentu umanidade”, nia subliña.

Iha momentu ne’ebá, Virgílio hahú kontaktu ho jornalista sira husi Indonézia atu fó informasaun kona-ba situasaun Timór nian no nia hamutuk ho ativista timoroan sira, no simu órden ida husi Fernando La-Sama Araújo ne’ebé husu atu hein no atende de’it telefone husi jornalista ne’ebé ko’alia lian portugés no inglés.

“Ida-ne’e tanba ha’u nia kapasidade atu komunika ho lian portugés no inglés, liuliu atende kontaktu husi jornalista sira hanesan iha Agência Lusa no mós jornalista sira-ne’ebé kontaktu ho lian Inglés, ha’u mak fó informasaun. Ho konfiansa ida-ne’e maka hahú aumenta liután ha’u-nia vontade no dezeju atu bele serbisu iha mundu jornalizmu”, nia konta.

Ho esperiénsia ne’e, maka iha tinan 1998, Virgílio ho nia maluk sira harii revista ida naran Talitakum no iha tinan 1999 hafoin referendu, hamosu tan revista naran Vox Populi, inklui revista Lalenok.

Iha 2003 to’o 2006, Virgílio konta tuir katak, Governu dahuluk nomea nia nu’udar membru Prezidente Administrasaun Rádiu Televizaun Timor-Leste no hanesan mós Diretór Jerál no iha 2016 hetan nomeasaun hanesan Prezidente Konsellu Imprensa to’o ohin loron.

Nune’e, Virgílio ninia kontribuisuan ba jornalizmu la’o dezde uluk kedas to’o agora, tanba ne’e profisaun jornalizmu ba nia hanesan vokasaun ida no nu’udar responsabilidade ida.

“Kapasidade tékniku de’it atu halo notísia ne’e la sufisiente atu sai jornalista, maibé tenke hadomi profisaun ne’e rasik”, nia subliña.

Nia hatutan: “Ha’u deside atu kontinua serbisu iha mundu jornalizmu maski la tenke serbisu hanesan jornalista, maibé hanesan observadór ne’ebé kontinua tau atensaun ba dezenvolvimentu mídia. Tanba ne’e mak koñesimentu ne’ebé ha’u iha sei kontinua serbisu iha mundu jornalizmu bainhira iis ne’e sei iha”.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here