Lansamentu "Livru Konsulta Populár 30 Agostu 1999" iha Parlamentu Nasionál, tersa ne'e. Imajen Tatoli/Hortençio Sanchez

DILI, 10 dezembru 2019 (TATOLI)–Prezidente Parlamentu Nasionál, Arão Noé de Jesus da Costa Amaral, hateten loron 10 dezembru hanesan Loron Direitu Umanu. Tanba ne’e, Parlamentu Nasionál (PN) taka loron ne’e ho lansamentu livru “Konsulta Populár 30 Agostu 1999”.

“Ohin loron ne’e loron internasionál direitu umanu nian. Ita taka síklu selebrasaun ne’e ho lansamentu livru kona-ba testemuña sira-ne’ebé partisipa iha loron espesiál Timor-Leste muda nia dalan ba ukun rasik-an. Dalan ne’e merese atu temi no fó omenajen ba sira-ne’ebé uluk luta no funu ba Timor nia direitu ba ukun rasik-an,” Arão dehan iha nia intervensaun bainhira lansa livru refere, iha Parlamentu Nasionál, tersa ne’e.

Lee mós: Livru Konsulta Populár Hanesan Memória ba Jerasaun Futura

Iha biban ne’e, aproveita loron internasionál direitu umanu ne’e, Parlamentu Nasionál atribui mós títulu sidadaun Timor ba jornalista estranjeiru ne’ebé filma Masakre Santa Kruz, Max Stahl, tanba ninia kontribuisaun relevante ba Timor-Leste nia independénsia.

“Parlamentu Nasionál la haluha hato’o omenajen ba Max Stahl, belun boot Timor-Leste nian ne’ebé divulga informasaun ba mundu internasional atu mundu hatene sofrementu povu Timor-Leste hamutuk ho nia maluk seluk mós. Ohin, Parlamentu Nasionál atribui Nasionalidade Timorense ba nia tanba serbisu relevante ne’ebé nia halo ba ita-nia nasaun,” nia tenik.

Tuir Arão, Max Stahl merese duni atu sai sidadaun Timor tanba ho nia aten barani no apoiu tebes ba kauza povu Timor nian luta ba liberdade, liuhosi filmajen ne’ebé nia hasai iha Masakre Santa Kruz 1991 ne’ebé halo fanun mundu nia neon ba injustisa hirak-ne’ebé timoroan sira enfrenta.

Entretantu, iha livru “Konsulta Populár 30 Agostu 1999” ne’e, Max Stahl mós hola parte hanesan istoriadór no sasin ba akontesimentu sira iha tempu pasadu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here