Xefe Departamentu Saúde Ambientál, José Moniz. Imajen: Felicidade Ximenes

DILI,10 dezembru 2019 (TATOLI)-Ministériu Saúde (MS) liuhusi Programa Saúde Ambientál realiza workshop nasionál revizaun estratéjia saúde ambientál 2014 to´o 2019 nofinaliza esbosu kurríkulu programa saúde ambientál tinan-2019 iha Timor-Leste (TL).

Xefe Departamentu Saúde Ambientál, José Moniz informa katak MS iha estratéjia saúde ambientál ne´e iha komponente sia ne´ebé mak define iha tinan-2014 to´o 2019 maibé implementa de´it lima tanba rekursu la to´o  em termos de kapasidade atu implementa no mós orsamentu ba programa saúde ambientál mós la sufisiente atu implementa komponente sia  ne’ebé mak sai estratejia ba programa saúde ambientál nian.

“Entaun komponente lima ne’ebé implementa mak hanesan konponente  dahuluk preokupasaun komunidade nian haree liu kona-ba problema bee moos tanba komponente ne’e ko’alia liu kona-ba bee ho nia kualidade oinsá mak atu proteje,” dehan Xefe José Moniz ba media sira iha Suai room, Timor Plaza, ohin.

Komponente daruak, tuir ezekutivu ne´e mak oinsá mak ita haree kona-ba komunidade ne’ebé moris iha ambiente ne’ebé mak la saudável ne’e haree liubá komponente saneamentu no ijiéne  nian. Komponente datoluk ko’alia kona-ba komponente ai-han seguru hanesan hahán sira ne’ebé mak seguru hanesan ema han tenke haree no tau-matan.

Komponente dahaat mak haree liubá kontrolu fatór ne’ebé haree liubá fatór ida ne’ebé mak lori moras hanesan lalar, susuk, barata; ne’e mós komponente ida.

Komponente dalima mak halai liubá iha jestaun lixu hanesan lixu doméstiku no mós lixu médiku lixu iha ospitál, lixu iha klínika ita tenke asegura ida ne’e.

“Balun ne’ebé  ami implementa maibé seidauk realiza mak hanesan komponente ida mak mudansa klimátiku ida ne’e departamentu saúde ambientál nian komponente, ar ka anin ne’e nia influénsia mak hanesan akudesan ida ne’e mós fó impaktu ba moras infesaun vias respiratóriu maibé programa ne’e ami la implementa tanba orsamentu la to´o,” nia dehan.

“Hanesan mós komponente ida kona-ba padraun  uma balun tuir standar (padraun) no  komponente hirak ne’e mak ami sei diskute iha loron rua ohin no aban para haree oinsá mak atu bele hadi’a no kompleta hodi implementa iha Timór  tanba  nesesidade  agora ne’e obriga ambiente. Ema barak ita haree moras beibeik halo kurativu de’it maibé prevensaun  la iha ami-nia asuntu intervensaun ne’e ba iha prevensaun”.

Iha komponente sia ne´e, tuir Xefe Departamentu Saúde Ambientál José Moniz  katak ba prevensaun para ema ne’e labele hetan moras iha aspetu sira ne’ebé mak iha komponente sia ne’e rasik.

“Ita haree ita-nia komunidade sira barak mak moris iha ambiente ne’ebé mak la saudável ezemplu hanesan komunidade iha área rurál  barak mak la uza sintina  entaun la iha sintina ninia implikasaun ba  saúde ne’e boot,” nia konsidera.

Dahuluk, Xefe José Moniz katak moras sira ne’ebé mak mosu hanesan diarea tanba ne’e kontaminasaun ba iha bee ba iha rai liuliu afeta ba labarik sira ne’ebé tinan-lima ba kraik ne’e problema ida ne’ebé ita hasoru.

Daruak problema iha bee hanesan komunidade halerik ba iha bee oinsá ita bele haree ba nia kualidade  hanesan kualidade ita la haree ho rekursu sira ne’ebé mak limitadu ne’e susar tebes ita atu prevene moras ne’ebé  mais ambiente.

“Tanba bee ho buat hirak ne’e husi ambiente ne’ebé mak la saudável  ezemplu hanesan ema hadi’a estrada ho sitausaun ida ne´e rai rahun maka’as ho ar sira ne’ebé mak la moos entaun moras ISPA (infesaun vias respiratóriu) ne’e sai númeru ida iha Timor-Leste  tanba n’ee mak prioridade ne’e haree liubá ambiente no bee tanba bee la iha ita sira ne’e labele moris no ita labele saudável tanba buat hotu ita tenke moos,” nia esplika.

Jornalista        : Felicidade Ximenes

Editór              : Rafy Belo

HAKEREK NO HATÁN

Please enter your comment!
Please enter your name here