Administradór Parokiál Bobonaro, Padre Carlos Gonclçalves prezide misa agradesimentu família boot TATOLI,IP, iha Kapela Virgen Peregrina Marobo, Munisípiu Bobonaro, Domingu (08/12). Imajen Tatoli/António Gonçalves

BOBONARO, 07 dezembru 2019 (TATOLI) – Família boot husi Agência Noticiosa Timor-Leste, TATOLI. IP, taka ninia atividade tinan 2019 ho misa agradesimentu iha Kapela Virgem Peregrina Marobo, ne’ebé prezide husi Administradór Parokiál Bobonaro, Padre Carlos Gonçalves.  

Misa agradesimentu ne’e, hala’o iha loron Sábadu, 7 dezembru, ho solenidade Nossa Senhora Imaculada da Conceição no Domingu Adventu daruak.

Iha ninia omília, Padre Carlos halo reflesaun bazeia ba Evangellu São Lucas 1:26-38, ne’ebé ko’alia kona-ba Virgen Maria hanesan feto ida-ne’ebé obedese tebes ba Maromak hodi ko’us Jesus Kristu nu’udar maksoin mundu nian ho liafuan, “ne’e sá atan-oan mak ne’e, halo tuir Ita-Nia liafuan ba”.

Hafoin misa agradesimentu, família boot TATOLI,IP foto hamutuk Administradór Parokiál Bobonaro, Padre Carlos Gonclçalves no komunidade Marobo ne’ebé tuir misa. Imajen Tatoli/António Gonçalves

Padre Carlos esplika, lia fuan no asaun prontidaun Na’in Feto Virgem Maria nian halo Maria sai nu’udar ezemplu ba sarani sira nia moris iha tempu Adventu.

“Iha diálogu, bainhira Anju fó hatene ba Maria katak, Ó sei ko’us, Maria hatán katak: oinsá ha’u bele ko’us sé hau la hola mane? Iha momentu ne’ebá kedan, Anju hatán katak: Ó sei ko’us la ho sala maibé ho obra Espíritu Santu. Katak, Maria Imaculada da Conceição”, Padre Carlos esplika sitasaun husi Evenjellu Lucas.

Padre Carlos hateten, reflesaun ne’ebé presiza halo tuir nu’udar sarani maka obediensia husi Na’in-Feto nu’udar ida-ne’ebé Nia rasik hatene no kompriende konsekuénsia saida mak sei akontese ba Nia.

“Virtude ne’ebé Na’in-Feto hatudu maka virtude ne’ebé hadi’a filafali relasaun antiga ne’ebé kotu iha Adão no Eva nia tempu tanba Maria sai hanesan Eva foun no Jesus sai hanesan Adão foun”, Amu Carlos subliña.

Tanba ne’e, Padre Carlos konvida sarani sira hodi halo reflesaun iha tempu Adventu, nune’e bele imita tuir virtude Na’in-Feto nian, katak obedese ba buat ruma sempre ho baze legál tanba kompriende no hatene.

Hafoin misa, Padre Carlos mós espresa ninia sentimentu kontente tanba família boot TATOLI hili kapela Marobo hodi ensera atividade tinan 2019 ho misa agradesimentu.

Nune’e, nia enkoraja estrutura ezekutivu TATOLI hamutuk ho funsionáriu tomak atu kontinua serví públiku iha tinan foun, ne’ebé konta nafatin ho intervensaun Maromak nian.

“Obrigadu barak ba prezensa família boot TATOLI”, Padre Carlos dehan.

Nune’e mós Prezidente TATOLI, José da Costa, hateten objetivu ida husi retiru annuál TATOLI nian maka atu agradese no renova kompromisu.

“Iha ámbitu ida-ne’e maka ita hakarak atu agradese ba Maromak ba buat hotu no grasa tomak ne’ebé ita simu. Tanba ita fiar katak susesu sira ne’ebé mak ita atinji iha tinan ida-ne’e, la’ós tanba ita nia matenek mesak maibé tanba bensaun no grasa ne’ebé Na’i Maromak fó, nune’e ita mós labele haluha agradese ba Nia liuhusi misa atu ita bele iha kbiit liután hodi halo serbisu iha tinan oin”, nia esplika.

Ikus liu, Prezidente José da Costa, lori família boot TATOLI nia naran, agradese ba Administradór Parokiál Bobonaro, Padre Carlos Gonçalves, ninia disponibilidade hodi prezide misa.

“Agradese ba Amu, maski iha tempu Adventu iha preokupasaun barak maibé fó tempu hodi prezide misa ida ba família boot TATOLI”, nia dehan.

Entretantu, misa ne’e hetan partisipasaun másimu hosi estrutura ezekutivu TATOLI hamutuk ho  funsionáriu TATOLI. IP tomak hamutuk 43, inklui komunidade Marobo.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here