Mapa Ataúru. Foto/Google.

ATAÚRO, 09 dezembru 2019 (TATOLI) – Xefe Administrasaun Postu Administrativu Ataúro, Munisípiu Dili, Jesuíno Freitas, hateten ró Sukses ne’ebé halo operasaun bá-mai Dili-Ataúro iha semana ida, dala ida de’it ne’e difikulta movimentu turista lokál no estranjeiru sira.

“Ami sente triste uitoan tanba ró Nakroma maka seidauk bele mai entaun ró Sukses ne’e halai semana ida dala ida de’it (sábadu) iha Ataúro difikulta mós pasajeiru sira ne’ebé hakarak mai vizita Ataúro, la’ós estranjeiru de’it maibé mós ita rasik”, Jesuíno Freitas afirma ba TATOLI iha salaun administrasaun Postu Administrativu Ataúro, ohin.

Nia hatete fulan rua liubá bainhira Nakroma seidauk bá halo manutensaun, movimentu pasajeiru bá-mai la’o di’ak tebes, tanba iha ró rua kedas hanesan Nakroma no Dragon.

“Kompara ho antes bainhira Nakroma seidauk bá halo manutensaun, movimentu pasajeiru hosi Dili mai Ataúro nune’e mós Ataúro bá Dili la’o di’a, tanba antes ne’e ró Dragon mós halai, entaun Dragon halo operasaun iha loron sesta, sábadu, domingu, segunda no tersa, ne’ebé pasajeiru sira liuliu estranjeiru hanoin ona katak sira mai iha sesta, tersa maka fila, maibé agora ró sira ne’e la halo ona operasaun entaun difikulta ema atu mai vizita ami-nia rain, tanba sira kuandu mai hela konserteza ami-nia komunidade hetan netik osan uitoan tanba sira mai presiza toba fatin, hahán”, haklaken Xefe Administrasaun ne’e.

Iha 30 setembru ne’e, ró Nakroma bá halo manutensaun iha Surabaya-Indonézia ne’ebé halo husi kompañia Ben Santoso no daudaun atinje ona porsentu 85.

“Ne’ebé ha’u espera  katak  iha loron 10 to’o 15 dezembru  tenke mai ona  iha Timor-Leste atu fasilita ita-nian komunidade Oe-Cusse no Ataúro halo viajen durante loron boot Natál ho tinan foun ninian”, Prezidente APORTIL Flávio Neves ba TATOLI, iha knaar fatin Portu Dili, foin lalais ne’e.

Durante Nakroma seidauk mai, ró Sukses mak halo operasaun tula pasajeiru sira bá-mai Dili-Ataúru no Oe-Cusse.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here