Diretór Ezekutivu Fórum Organizasaun Naun Governamentál Timor-Leste (FONGTIL), Daniel Santos do Carmo. Imajen Tatoli/Cipriano Colo

DILI, 09 dezembru 2019 (TATOLI)–Sosiedade Sivíl husi Forum Organizasaun Naun Governamentál Timor-Leste (FONGTIL), konsidera Governu retira orsamentu jerál Estadu (OJE) 2020 husi Parlamentu Nasionál (PN), tanba iha problema komunikasaun entre koligasaun Aliansa Mudansa ba Progresu (AMP).

“Razaun ne’ebé ita observa no haree husi li’ur hatudu katak komunikasaun iha AMP laran iha problema. Razaun sira-ne’ebé iha dehan OJE la estruturadu no inkonstitusionál, ne’e la’ós kauza prinsipál”, Diretór Ezekutivu FONGTIL, Daniel Santos do Carmo hateten lia hirak-ne’e iha nia serbisu fatin, Caicoli, Dili, ohin.

Lee mós: Governu Dada Proposta OJE 2020 Husi PN

Nia esplika, buat sira sala ki’ik-oan hanesan foin lalais ne’e la divia husu Governu atu retira orsamentu jerál Estadu 2020 husi Parlamentu Nasionál (PN).

“Maibé, normalmente, ida-ne’e akontese iha nasaun demokrátiku sira hotu, tanba dalaruma buat ne’ebé inkonstitusionál, maibé liuhusi konsensu polítika bele halo di’ak”, Daniel haktuir.

Atu sees husi situasaun ne’e, sosiedade sivíl konsidera katak ida-ne’e kabe ba konxiénsia morál husi polítiku sira atu hatuur interese nasionál aas liu.

“Buat fasil ida maka partidu tolu ne’ebé forma koligasaun hanesan CNRT, PLP no KHUNTO, buka atu kolabora ba malu liuhusi diálogu kontinua entre partidu no diálogu kontinua mós ho Prezidente Repúblika”, nia sujere.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here