Xefi Suku Ilat Laun (Marobo), Juvenal Pires. Imajen/Eugénio Pereira

MAROBO, 09 dezembru 2019 (TATOLI)- Postu Saúde área Atuegas, Suku Ilat-Laun (Marobo), Postu Administrativu Bobonaro, Munisípiu Bobonaro,  enfrenta difikuldade menus rekursu pesoál saúde.

Notísia Relevante : Presiza Jere Bee Manas Marobo Tanba Hahú “Abandona”

Ho difikuldade ne’e, Xefe Suku Ilat-Laun, Juvenal Pires, husu ba Ministériu Saúde atu buka solusaun hodi halo destakamentu pesoál saúde  iha Postu Saúde Atuegas atu   bele ajuda fó atendimentu saúde ba povu suku tolu iha Marobo, kompostu Suku Soileco, Ilat-Laun no Atuaben.

Suku tolu ne’e ho totál abitante rihun, foin iha númeru rekursu parteira ida de’it, tanba ne’e, hasoru dezafiu atu halo atendimentu ba povu ho efisiénsia no efikásia.

Xefe Suku ne’e dehan, dala ruma  komunidade sira hulan de’it ema moras ou inan  balun ba postu saúde sira iha vila mezmu distánsia dook, tanba pesoál saúde sira la sufisiente atu bele fó atendimentu ho di’ak.

 “Iha 2017 akontese ita nia inan ida família sira hulan de’it lori ba Postu Saúde Atuegas too ba ita nia parteira ba tuir tiha formasaun iha Maliana, entaun postu saúde taka, bebé moris mai mate de’it, tanba la iha parteira ka médiku ruma mak atu ajuda,”  informa  Xefe Suku Juvenal Pires, ohin, ba Ajénsia TATOLI iha Marobo.

Problema ne’e rasik autoridade suku Marobo sira hato’o ona ba Diretór Sentru Saúde Postu Administrativu Bobonaro atu koloka médiku no doutór espesialista balun ba, maibé seidauk hetan resposta.

Problema seluk tan, Juvenal hateten, dala ruma too tempu udan, komunidade sira iha Aldeia Porugua ne’ebé hela dook ho distánsia kilómetru 20 hosi Suku Ilat-Laun labele hetan asesu ba tratamentu saúde tanba kondisaun estrada aat difikulta transporte asesu to’o área refere.

“Too tempu udan mota tun ami nia povu Aldeia Purugua labele asesu ba saúde, tanba mota boot tun difikulta povu inklui estudante sira atu ba eskola,”  nia tenik.

Tuir nia katak, iha aldeia sira ne’ebé dook médiku sira liuhosi programa  SISCA (Standing for Integrated Community Health Services) sempre halo vizita kada fulan hodi ba fó konsulta ba povu sira, maibé programa ne’e paradu bainhira tempu udan.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here