Komandante PNTL Eskuadra Ataúro, Inspetór Polisía Miguel Vieira Soares. Imajen TATOLI/Antónia Gusmão.

ATAÚRO, 09 dezembru 2019 (TATOLI) – Polísia Nasionál Timor-Leste (PNTL) eskuadra Ataúro, Munisípiu Dili, garante seguransa iha loron boot Natál no tinan foun 2020.

Komandante Eskuadra Polísia Ataúro, Inspetór Polísia Miguel Vieira Soares, informa seguransa en jerál iha territóriu illa Ataúro seguru.

“Seguransa iha Ataúro la’o di’ak. Agora daudaun ami halo ona preparasaun hamutuk ho autoridade lokál inklui administradór postu nune’e iha festa Natál no tinan foun bele la’o ho di’ak”, Inspetór Polísia Miguel Vieira Soares ba Tatoli hafoin partisipa Konferénsia Munisipál “Hakerek Istória Rezisténsia Timor-Leste” iha salaun Administrasaun Postu Administrativu Ataúro, Munisípiu Dili, ohin.

Autoridade seguransa ne’e dehan menus rekursu umanu no ekipamentu la sai obstákulu ba sira atu hala’o seguransa iha komunidade nia leet.

“Ha’u hanoin kona-ba menus ekipamentu la fó impaktu ba ami-nia servisu, ekipamentu iha ou laiha ami mantén nafatin ami-nia kna’ar tuir lei haruka atu asegura komunidade”, katak.

Atu seguransa la’o di’ak liután, PNTL Ataúro sempre serbisu hamutuk ho autoridade lokál, membru FALINTIL-Forsa Defeza Timor-Leste (F-FDTL) destakadu, no Konsellu Polisiamentu Suku (KPK).

Inspetór Polísia ne’e mós husu ba joven sira atu koopera hodi kria pás no estabilidade iha illa ne’e.

“Agora daudaun, KPK estabelese hotu ona iha suku lima iha Ataúro hanesan Makadadi, Makili, Beloi, Vila no Bikeli”, katak.

Totál membru PNTL iha Eskuadra Ataúro hamutuk 14 inklui komandante eskuadra no adjuntu.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here