Eis Vise-Ministra Kuidadu Saúde Primaria, Elia Dos Reis Amarál hamutuk ho Vise-Ministru Dezenvolvimentu Estratejia Saúde, Bonifacio Maucoli hala'o konferénsia imprensa relasiona ho gravasaun ne'ebé virál iha media sosiál.Imajen: Felicidade Ximenes

DILI, 09 dezembru 2019 (TATOL)-Ministériu Saúde (MS) sei halo investigasaun kle´an ba funsionáriu ne’ebé mak partilla  informasaun kona-ba diskusaun entre Vise-Ministra Kuidadu Saúde Primaria, Elia dos Reis Amarál hamutuk ho Vise-Ministru Dezenvolvimentu Estratejia Saúde, Bonifacio Maucoli to´o sai virál iha media sosiál.

Vise-Ministra Kuidadu Saúde Primaria, Elia dos Reis Amarál hamutuk ho Vise-Ministru Dezenvolvimentu Estratejia Saúde, Bonifacio Maucoli  hala’o konferénsia imprensa relasiona ho gravasaun ne’ebé  virál iha media sosiál katak konsidera hanesan problema ne’e uma laran nian.

“Ita hotu akompaña gravasaun ne’ebé virál ona iha media sosiál katak situasaun ne’e Ministériu Saúde hakarak klarifika gravasaun ida ne’e katak momentu ne’ebá akontese dezentendimentu internál ida,” dehan Vise-Ministra Kuidadu Saúde Primaria, Elia dos Reis Amaral bainhira hala’o konferénsia imprensa iha Palácio Cinzas, Caicoli, ohin.

“Dezentendimentu internál kada instituisaun ne’e ami konsidera katak ida ne’e normál maibé  dezentendimentu ne’e ami haree ba lala’ok servisu saida de’it mak la dun di’ak para hodi halo ba di’ak liután,” reforsa Vise-Ministra Kuidadu Saúde Primaria.

Nune’e mós, tuir Governante ne´e, ita haree diak liután ba servisu reprezentasaun ba iha atendimentu ba ita-nia populasaun sira no oinsá ita atu lori dezenvolvimentu husi instituisaun ida ne’e ba públiku no dezentendimentu ne’e la’ós tanba odio malu no la’ós lori situasaun ne’e lori ba naruk ne’e lae.

“Maibé, atu loke no halo di´ak liután ita-nia hanoin, buat ne’ebé hotu ne’e  hotu ona no ami nain rua Vise-Ministru Dezenvolvimentu Estratéjiku Saúde sempre iha liña koordenasaun ne’ebé mak di’ak”.

“Ami mós husu ba instituisaun balun atu iha kompeténsia atu halo investigasaun kle’an ba funsionáriu ne’ebé mak grava no fó sai informasaun ne’e ba públiku  hodi nune’e ita bele hatene funsionáriu ne’ebé halo faktus ne’e ho nia motivasaun saida.

Tanba, dala ida tan tuir Vise-Ministra Kuidadu Saúde Primaria katak ita hotu hatene Ministériu Saúde ho familia ne’ebé mak boot tebes no familia ne’e belé  prontu atu atende ba populasaun sira liuliu ba moras sira ho fuan ho domin ba populasaun no prontu atu atende iha oras 24 nia laran.

“Ita hotu hatene katak dezentendimentu iha ne’ebé de’it sempre akontese maibé Ministériu Saúde hanesan família ida no dezentendimentu internál uma laran mak sei rezolve. Hanesan familia ami enkontru asuntu internál tanba ne’e mak Ministériu Saúde sai hanesan ita -nia familia ita bele diskute malu maibé sempre iha únidu ba malu no lori Ministériu Saúde ba oin”.

Vise-Ministra Kuidadu Saúde Primaria, Elia dos Reis Amaral klarifika klarifika, situasaun ida ne’e, prosesu hirak ne’e tama ona investigasaun nian hodi bele hatene aktu sira ne’ebé mak akontese iha MS nia laran. “Dezentendimentu ida nee la’ós atu fahe servisu sira iha Ministériu maibé dezentendimentu ne’e atu haree no halo korresaun ne’ebé mak iha atu hadi’a ba prestasaun servisu ne’ebé mak iha”.

Entretantu, gravasaun kona-ba diskusaun entre Vise-Ministra Kuidadu Saúde Primaria, Elia dos Reis Amaral ho Vise-Ministru Dezenvolvimentu Estratejia Saúde, Bonifacio Maucoli, tuir  Vise-Ministra Kuidadu Saúde Primaria, Elia Dos Reis Amarál katak dezentendimentu internál ne´e hahú iha loron 22 novembru fulan kotuk no virál iha media sosiál  iha loron neen fulan dezembru tinan ne’e.

 Jornalista : Felicidade Ximenes

Editór        : Rafy Belo

HAKEREK NO HATÁN

Please enter your comment!
Please enter your name here