Sesaun plenária Parlamentu Nasionál. Imajen/TATOLI

DILI, 09 dezembru 2019 (TATOLI)–Deputadu bankada FRETILIN, Francisco Miranda Branco, husu ba Governu liuliu Primeiru-Ministru (PM), Taur Matan Ruak, atu haree no foti medida ne’ebé sériu ba membru Governu rua ne’ebé inkompetente ne’ebé sira-nia gravasaun virál tebes iha públiku.

“Medida ne’ebé atu hasai ba hahalok vise ministru na’in rua, medida ne’e tenke ekilibradu. Hahalok ne’e reflete governasaun ida laiha responsabilidade. Diskute iha públiku la’ós interese nasionál ka povu nian maibé diskute fali interese sira na’in rua nian,” dehan Branco iha plenária Parlamentu Nasionál (PN), segunda ne’e, relasiona ho Vise Ministru Saúde, Bonifácio Maukoli dos Reis no Vise Ministra Saúde, Elia António de Araújo dos Reis Amaral ne’ebé diskute malu kona-ba atividade Ministériu Saúde iha ne’ebé ema balun lansa ona ba rede sosiál, semana kotuk.

Nia dehan, hahalok ne’ebé membru Governu na’in rua halo ne’e hatudu momoos katak sira só interese de’it ba sira-nia kadeira no pozisaun.

“Ida-ne’e hanesan eskándalu nasionál ida-ne’ebé ita tenke kurije kedas, la’ós medida seluk atu fó sai ba públiku ka la fó sai. Ida-ne’e tenke fó medida sériu,” deputadu ne’e informa.

Iha sorin seluk, deputada bankada Kmanek Haburas Unidade Nasionál Timor Oan  (KHUNTO), Olinda Guterres mós husu atu haree membru Governu na’in rua ne’ebé laiha kapasidade di’ak liu bele hasai nune’e troka fali ema seluk.

“Governu tenke haree membru na’in rua ne’ebé laiha kapasidade buka mak diskute malu ba pozisaun de’it. Matenek agora barak  la’ós mak sira na’in rua ne’e de’it. Sira-ne’e halo moe an de’it. Tenke troka ema hanesan ne’e. Remodelasaun ne’e mosu ona ba para troka tiha ema hanesan ne’e, xa” Olinda realsa.

Hatán ba preokupasaun hirak-ne’e, Sekretáriu Estadu Komunikasaun Sosiál (SEKOMS), Merício Juvenal dos Reis Akara, hateten Governu akompaña duni hahalok membru Governu rua ne’e no sente lamenta tebes.

“Ami akompaña duni hahalok membru Governu rua ne’e. Ita lamenta tebes. Maibé, agora sei la’o ba iha prosesu investigasaun kona-ba sé mak halo gravasaun ida-ne’e. Loloos enkontru internál ne’e labele grava hodi fó sai ba públiku. Ita tama ona ba prosesu investigasaun para buka hatene loos ema ne’ebé halo gravasaun ne’e,”  Akara informa.

Nia haklaken, bainhira prosesu investigasaun ramata foin haree hodi hola medida ruma.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here