Logotipu CO25.

ATAÚRO, 09 dezembru 2019 (TATOLI) – Komité Orientadór 25 (CO25, sigla portugés) husu atu povu liuliu veteranu no sobrevivente sira Ataúro konta istória loloos ba peskizadór KO25 nian bainhira tun bá halo entrevista.

KO25 mós husu atu veteranu sira labele konfunde sala katak KO25 atu mai verifika dadus veteranu sira ne’ebé la tuir tempu luta sira-nian. Maibé, misaun KO25 maka rekolla istória rezisténsia Timor-Leste nian.

Pedidu ne’e hato’o hosi membru KO25, António Ai-Tahan Matak iha konferénsia KO25 ho tema “Hakerek Istória Rezisténsia Timor-Leste nian” ne’ebé hala’o iha salaun administrasaun Postu Administrativu Ataúro, Munisípiu Dili, ohin.

“Istória ne’e iha área rua, hanesan área pasada tempu bei-ala sira-nian kuandu ema kaer iha tinan 24, kuandu kolonializmu ukun ne’e lori mai tau hotu iha Ataúro, balu la fila, ne’ebé to’o agora bei-oan ruma iha, dokumentu ruma iha hatudu ba peskizadór Komité Orientadór 25”, Ai-Tahan Matak sujere.

Nia dehan, membru KO25 sira hasoru difikuldade bainhira tun bá halo peskiza iha munisípiu tanba hetan informasaun katak veteranu balu lakohi fó istória tanba luta sira-nian hakerek laloos hosi komisaun verifikasaun.

Nune’e António Ai-Tahan Matak husu ba prizioneiru polítiku ne’ebé mai hosi 1980-1983 to’o funu remata labele subar istória tanba istória buat ketak ida no direitu buat ketak, tanba istória valór ba Estadu no direitu ema ida maka hetan osan no mate ona rai taka tilun laiha tan ona osan. Maibé istória jerasaun ba jerasaun sei nafatin, istória mak sai hanesan referénsia, istória maka bele halo lei, bele hadi’a sistema.

Ai-Tahan Matak subliña, livru ne’ebé mak sei hakerek hosi KO25 maka sai hanesan livru istóriku Estadu RDTL.

Tanba ne’e KO25 husu atu ema hotu apoia hodi konta istória ba peskizadór KO25 nian nune’e bele prodús livru ida ho istória loloos ba timoroan hotu iha agora no futuru.

Notísia relevante : KO25 Realiza Konferénsia Molok Hakerek Istória Rezisténsia TL Nian

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here