Xefe Suku Parlamentu, Postu Administrativu Lautem no Munisípiu Lautem, Ângelo Calvão Silva/ Imajen Tatoli,IP.

LAUTEM, 09 dezembru 2019 (TATOLI) – Tuir observasaun fízika hosi ekipa task force hatudu katak moras Peste Suíne Afrikana (ASF-sigla portugés), hahú menus ona hafoin hamate fahi rihun 16 iha territóriu Timor-Leste, hahú hosi jullu to’o novembru, maibé iha Suku Parlamentu fahi kontinua mate kuaze 365.

“Ami-nia área potensiál ba populasaun hakiak fahi, maibé durante ne’e ita haree movimentu fahi agora ladún ona, tanba barak maka mate no sei kontinua mate”, Xefe Suku Parlamentu, Ângelo Calvão Silva, ba Ajénsia TATOLI, ohin.

Tuir dadus husi xefe aldeia lima hanesan Soi-Kili, Ipar-Ira, Lai-Ara, Moru no Ira-Ara, hamutuk fahi kuaze 365 mak mate ona maibé sei kontinua mate, nune’e xefe suku konsidera dadus ne’e sei provizóriu.

“Ami-nia fahi sei kontinua mate tan, ne’ebé ami seidauk hatene bainhira mak moras ne’e lakon”, katak.

Ângelo Silva haktuir katak MAP husu ba abitante sira atu halo luhan ba fahi nian hodi asegura bioseguransa, atu veterinária bele halo vasinasaun, nune’e bele evita fahi ne’ebé afetadu hosi virus epidémiku.

Suku Parlamentu kompostu husi aldeia lima hanesan Soi-Kili, Ipar-Ira, Lai-Ara, Moru no Ira-Ara ho totál populasaun 3.070 husi umakain 636.

Antes ne’e, Diretór Jerál Pekuária no Veterinária, Domingos Gusmão, dehan ekipa task force rekolla dadus katak moras ASF agora tún tiha ona, tékniku sira orientadu atu atualiza dadus epidemic atu haree nia persentajen ka númeru hira no tún ba hira ona, tanba ne’e semana ne’e maka sei haree totál fahi ne’ebé mate iha dezembru ne’e nia laran.

Enkuantu, moras ASF ne’e jeralmente kona de’it ba fahi sira ne’ebé na’in husik de’it ka la’o livre, tanba ne’e fasil hada’et lalais no deskonfia virus ne’e mai husi hahán importasaun hanesan na’an-fahi kalén no sosis husi rai-li’ur.

“Ami fó asisténsia téknika atu labele so’e arbiru fahi mate tanba ida ne’e mós da’et makaas liu ba fahi seluk ne’ebé laiha bioseguransa”, afirma.

Ekipa task force kompostu husi Autoridade Inspesaun no Fiskalizasaun Atividade Ekonómika no Sanitária (AIFAESA), Alfándega, Kuarentena, Polísia Unidade Fronteira no Polísia Migrasaun ne’ebé esforsu hamutuk hodi elimina Peste Suína Afrikana.

Entretantu, MAP hetan apoia husi Banku Dezenvolvimentu Aziátiku (ADB) hodi kontrata ona espesialista moras fahi husi Filipina hodi hala’o estudu hamutuk ho Organizasaun Saúde Animál Mundiál (OIE) atubele elimina virus ASF.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here