Sekretáriu Estadu Komunikasaun Sosiál, Merício Juvenal dos Reis Akara. Imajen /Tatoli Egas Cristovao

DILI, 09 dezembru 2019 (TATOLI)–Sekretáriu Estadu Komunikasaun Sosiál (SEKOMS), Merício Juvenal dos Reis Akara, nu’udar reprezentante Ministru Reforma Lejizlativa no asuntu Parlamentár, esplika ba deputadu sira katak bee-moos iha parte Acanuno no Hera, Postu Administrativu Kristu Rei, Munisípiu Dili, daudaun ne’e iha problema, tan ne’e Governu tau ona atensaun no parte tékniku sira halo hela manutensaun.

“Bee-moos iha Acanuno no Hera ita atende hela. Parte tékníku sira halo hela sira-nia servisu. Tempu besik populasaun iha ne’ebá bele hetan hotu ona bee-moos,” Akara dehan iha Parlamentu Nasionál (PN), segunda ne’e.

Tanba ne’e, nia husu ba membru PN hotu atu bele halo fiskalizasaun no akompaña prosesu ne’ebé la’o hela.

“Husu ba deputadu sira bele halo fiskalizasaun ba prosesu, tanba agora halo hela servisu,” Akara subliña hodi hatán ba intervensaun ne’ebé hato’o hosi deputada bankada Kmanek Haburas Unidade Nasionál Timor Oan (KHUNTO), Olinda Guterres, iha plenária PN, ohin.

Entretantu, Olinda haktuir, nia kestiona beibeik ona bee-moos iha parte Acanuno to’o iha Hera.

Tuir nia katak komunidade la asesu di’ak ba bee-moos, prejudika modo no ai-horis sira seluk mate. Ne’e duni, nia husu Governu bele haree didi’ak asuntu ne’e.

“Inkapasidade ne’e iha ne’ebé. Ha’u la’ós foin ko’alia. Ha’u ko’alia beibeik ona maibé Governu nafatin la tau konsiderasaun,” nia informa.

Aleinde ne’e, deputadu bankada Partidu Demokrátiku (PD), António da Conceição, hateten komunidade barak iha Dili laran seidauk asesu di’ak ba bee-moos. Tanba ne’e, nia husu Governu tenke tau atensaun sériu tanba daudaun ne’e bailoron naruk.

“Ita-nia komunidade barak mak seidauk asesu di’ak ba bee-moos liuliu iha parte Manumeta Rai-hun ne’ebá. Sira sempre lalin masa mamuk hodi la’o ba buka bee-moos. Agora bailoron naruk. Nusa Governu la haruka kareta tanki hodi lori bee ba komunidade semana ida dala rua de’it mós natón ona ba sira,” António tenik.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here