Zebra Cross. Imajen/Tatoli.

DILI, 09 dezembru 2019(TATOLI) – Diretór Kompañia Violet Unipessoal Lda, Sebastião S. da Silva, informa daudaun ne’e nia parte deside hapara provizóriu atividade pinta pasadeiru ka zebra cross tanba tinta laiha ona.

“Ami paradu ne’e la’ós tanba saida, maibé tinta maka laiha, tanba ne’e agora daudaun ami deside hapara atividade pinta zebra cross, no agora enkomenda ona tinta ne’e iha Malázia, espera katak iha dezembru bele to’o mai ona, ami diretamente pinta kedan zebra cross ne’ebé maka iha Dili laran”, dehan nia ba Ajénsia TATOLI via telefone, ohin.

Tanba tinta ne’e la hola iha Timor-Leste maka prosesu kleur uitoan, maibé garante bainhira tinta ne’e to’o lalais, kompañia bele aselera serbisu.

Relasiona ba tinta hotu, empreza hato’o ona ba Diresaun Nasionál Transporte Terrestre (DNTT) no hosi parte DNTT mós ba haree ona kompañia nia armazein rai tinta ba.

“Kona-ba ida ne’e ami hato’o ona ba iha sira DNTT bá haree direta ami nia armazein rai tinta hodi hatudu ba sira tinta hotu duni”, dehan Sebastião.

Entretantu, Diretór Kompañia Violet ne’e salienta sira konsege halo ona halo serbisu remarkasaun ba pasadeiru porsentu 30%.

Iha sorin seluk, Xefe Departamentu Sinál no Tráfiku DNTT, João Eugénio, hatutan hosi parte kompañia hato’o ona kestaun ne’e.

“Sira fó hatene mai ami ona, no ami to’o ba sira-nia armazein stock tinta hotu tanba ne’e provizóriu hapara atividade, maibé agora kompañia komesa enkomenda fali ona tinta ne’e, kuandu mai ona sira bele hahú sira-nian serbisu”, nia dehan.

Tinta ne’ebé empreza uza halo remarkasaun marka AASHTO M249-98, bazeia ba rekomendasaun husi DNTT liuhosi prosesu konkursu tanba hetan ona sertifikasaun iha Malázia.

Entretantu, pasadeiru ne’ebé empreza Violet sei halo remarkasaun iha Dili laran ho totál hamutuk 275.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here