Prezidente Autoridade Avisaun Civil Timor- Leste, Ana Rosália Ximenes Varela. Imajen/Natalino da Costa.

DILI, 09 dezembru 2019 (TATOLI) – Autoridade Aviasaun Sivíl Timor-Leste (AACTL, sigla portugés) liuhosi orientasaun Ministru Transporte no Komunikasaun (MTK), José Agostinho da Silva, halo inspesaun bá aeroportu Baucau.

Prezidente AACTL Ana Rosália Ximenes Varella hateten inspesaun ne’ebé halo foin lalais ne’e (13-19 novembru) atu haree besik kondisaun aeroportu Baucau.

Hodi informa mós katak daudaun ne’e, ekipa téknika enjeñeiru hosi Estadu Unidu Amérika (EUA) mak halo hela peskiza ba reabilitasaun aeroportu ne’e.

“Sira ekipa enjeñeiru Estadu Unidu Amérika nian konforme enkontru ho ami katak ida ne’e nu’udar etapa ikus ba sira (survey), no enjeñeiru sira EUA prepara ona atu tinan oin komesa halo rebilitasaun”, Ana Rosália ba TATOLI iha Kaikoli, ohin.

Nia hatutan iha inspesaun ne’e hosi parte ACCTL identifika katak kondisaun aeroportu Baucau ladún di’ak tanba odamatan boot no moru aat ona, inklui fatin pista aviaun rasik nakonu ho kuda no karau nia foer no mós ema tama sai livre iha aeroportu laran.

“Ida ne’e la garantia ba iha safe and security, maibé iha ami-nian enkontru ho enjeñeiru sira EUA sira sei rabilita ho di’ak no sei harii nu’udar forsa ba pista ne’ebé maka eziste, nunee pista ne’e bele tahan aviaun semo no tun, ida ne’e liga ba kestaun safe and security no ami-nia inspesaun ne’e fó hateten katak aeroportu hotu tenke garantia ba iha vida pasajeiru nian”, nia dehan.

Inspesaun ne’e AACTL halo bazeia ba dekretu lei númeru 8/2005, kontrolu aviasaun sivil nian atu fiskaliza aeroportu sira tuir padraun AACTL no Organizasaun Internasionál Aviasaun Sivíl (ICAO) nian.

Prezidente AACTL mós adianta reabilitasaun aeroportu Baucau ne’e nia orsamentu mai hosi Governu Estadu Unidu Amérika, nune’e seidauk hatene nia montante hira.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here