Lourença Soares Viana, dada lia ho partisipante Bali Democracy Forum hosi nasaun seluk. Imajen/Francisco Simões

BALI, 06 dezembru 2019 (TATOLI)—Experiência é um professor nobre”. Palavra  klásiku ho lian Portugés ne’e bele dehan, simples no fasil atu ko’alia, maibé ninia kompriensaun signifikativu tebes iha alin feto Lourença Soares Viana (tinan 24) nia moris.

Notísia Relevante : BDF 2019, Partisipasaun TL Importante iha Forum Internasionál

Lourença Soares Viana. Imajen/Francisco Simões

Ho kapasidade, abilidade, esforsu no dedikasaun, hakarak aprende no buka hatene, lori  Lourença  hetan onra boot  hosi Governu Timor-Leste liuhosi Ministériu Negósiu Estranjeiru Timor-Leste  (MNE-TL) bele reprezenta estudante Timor-oan sira partisipa iha Bali Democracy Student Conference iha ámbitu Bali Democracy Forum (BDF).

Bali Democracy Forum, tinan-tinan, hala’o iha Bali no tinan ne’e (2019)  hala’o ba dala-12 iha Nusa Dua, Bali, Indonézia, durante loron rua; hosi loron 05 to’o loron 06 dezembru, ne’ebé akomoda partisipante atus resin nu’udar reprezentante nasaun  90 no organizasaun internasionál hitu, hamutuk mós ho estudante nain 150 hosi nasaun sira Sudeste Aziátiku no Pasífiku, inklui kontinente Afrika nian.

Entre estudante hosi nasaun sira iha rejiaun Sudeste Aziátiku no Pasífiku, inklui kontinente Afrika nian, iha mós estudante feto Timor-oan ida ho naran Lourença Soares Viana.

Iha konferénsia nivel estudante nian ne’e ka Bali Democracy Student Conference, Lourença ativu tebes iha diskusaun hotu hodi aprende mós  ho nia maluk estudante sira hosi nasaun oioin  kona-ba “demokrasia no inkluzividade” ho nia sub-tópiku haree liu kona-ba sosiál mídia iha kontestu kredibilidade sosiál ka influensia sosiál mídia iha mundu dijitalizasaun no mós  sub-tópiku sira seluk, hanesan sosiál mídia ho demokrasia, sistema demokrasia ekosistema iha mundu indústria no mós plataforma sosiál mídia iha liberdade espresaun no liberdade imprensa.

Alin feto hosi Munisípiu Viqueque,  moris iha Dili iha loron 20 jullu 1995, sente onra boot no priviléjiu tebes reprezenta estudante Timor-oan iha eventu forum internasionál ne’e.

Bali Demokrasia Forum hanesan eventu annual hodi halibur membru governu, sosiedade sivíl no juventude sira hosi nasaun 90 iha mundu atu halo diskusaun no fahe sira nia esperiénsia kona-ba demokrasia relasiona ho tema Bali Demokrasia Forum, tinan ne’e, mak “Demokrasia no Inkluzividade”, hodi envolve grupu feto, juventude (estudante), sosiedade sivíl ho setór privadu  atu bele hametin “demokrasia inkluzividade”.

Nu’udar  jerasaun foun, Lourença konsidera nia partisipasaun ne’e valor tebes iha nia moris hodi aprende no observa forum ne’e ninia lala’ok no nia benefísiu, liuliu aprende ho nasaun seluk nia esperiénsia kona-ba “demokrasia no inkluzividade”.

Oan  ba da-ruak (segunda filha) hosi bin-alin hamutuk nain neen (6) (feto lima no mane ida) hosi Simão Soares Viana (matebian) ho Eliza de Oliveira ne’e, observa katak, hosi esperiénsia “demokrasia no inkluzividade” ne’ebé nasaun barak partilla iha Bali Demokrasia Forum ne’e, hanesan mós ho lala’ok pratika demokrasia iha Timor-Leste. Tanba tuir nia, Governu Timor-Leste mós iha polítika ida “inkluzividade” hodi fó oportunidade no envolve ema hotu iha desizaun públiku, garante liberdade imprensa no liberdade espresaun no asegura partisipasaun feto no ema ho defisiénsia sira iha vida ekonomia, sosiál no polítika.

“Ita Timor-Leste hanesan nasaun demokrátiku ida, ha’u haree ita hatudu ita nia prosesu “demokrasia inkluzividade” di’ak tebes hodi la husik ema ida iha kotuk ka la iha diskriminasaun ba ema ida  iha ita nia vida moris sosiál, polítika no ekonomia,” hateten Estudante  hosi Universidade Nasional Timor Lorosa’e (UNTL), Fakuldade Siénsia Sosiál, Departamentu Relasoins Internasionaís (2014-agora) ne’e bainhira dada lia ho Ajénsia TATOLI iha ámbitu enserramentu  Bali Democracy Forum, ohin, iha Sentru Konvensaun Nusa Dua, Bali.

Lourença, reprezentante únika estudante Timor-oan hosi Timor-Leste iha forum internasionál ne’e  sente priviléjiu tanba nia bele aprende no koñese di’ak liu tan kona-ba “demokrasia no inkluzividade” iha rai seluk nian, inklui bele estabelese komunikasaun no relasaun ho estudante sira seluk hosi nasaun seluk.

Bali Demokrasia Forum hanesan forum diskusaun no kolaborasaun  entre nasaun sira demokrasia iha Ázia ne’ebé sempre hala’o iha dezembru, tinan-tinan, iha Bali, Indonézia, ho objetivu  atu haforsa kapasidade demokrasia no hametin instituisaun demokrasia liuhosi diskusaun entre nasaun sira.

Bali Demokrasia Forum ba da-uluk hala’o iha loron 10 to’o loron 11 dezembru 2008,  ho tópiku sentrál “Building and Consolidating Democracy: A Strategic Agenda for Asia.”

Jornalista : Francisco Simões

Editór       : Xisto Freitas

HAKEREK NO HATÁN

Please enter your comment!
Please enter your name here