Prezidente Autoridade Munísipiu Manatuto, Fernando Sousa. Imajen Tatoli/Joanico de Araújo

MANATUTO, 04 dezembru 2019 (TATOLI) – Prezidente Autoridade Munísipiu Manatuto, Fernando Sousa, informa relasiona ho konstrusaun estrada área Beheda, Munisípiu Manatuto, ne’ebé atu muda komunidade sira iha área ne’ebá, nia parte hato’o ona ba Ministru Obra Públika, Salvador Eugénio Soares dos Reis Pires hodi rezolve preokupasaun komunidade afetadu ba konstrusaun.

“Liuhosi sira nia Xefe Suku no Xefe Aldeia, sira hato’o ona mai ami autoridade ho nune’e ami mós hato’o ona ba Ministru Obra Públika, ne’ebé foin lalais iha outubru, inaugura estrada Cairui. Ne’ebé ami fó hatene ona katak obra ida ne’e ita hotu nian, tanba ne’e ita tenke kontribui hanusa? Bainhira laiha indemnizasaun buat ketak ida, maibé bainhira iha, ita hotu tenke koopera. Ami nafatin koordena ho sira”, dehan Fernando ba Agência Tatoli iha nia kna’ar fatin, kuarta ne’e.

Notísia Relevante: Negosiante Beheda Husu Indemnizasaun ne’ebé Dignu

Nia dehan, bainhira autoridade munisípiu halo diálogu, komunidade iha área Beheda prontu koopera, tanba ne’e nia parte husu ba Governu Sentrál tenke rezolve lalais komunidade sira nia preokupasaun.

“Komunidade sira iha ne’ebá prontu atu koopera ho Governu, maibé tenke rezolve tia lai sira nia preokupasaun. Sé ita temi dehan indemnizasaun entaun ita tenke kumpre ita nia promesa. Bainhira ita dehan laiha indemnizasaun, ha’u hanoin komunidade sira mós sei la eziji”, nia realsa.

Tanba ne’e, nia mós husu ba Ministériu Obra Públiku (MOP) nasionál atu fó indemnizasaun ba komunidade afeitadu sira tuir regra.

“Ami husu ba Obra Públika, bainhira fó indemnizasaun tenke tuir regra ne’ebé mak iha. Ezempu atu selu karik uma ida nia tipu oinsá? Ami mós esplika ona ba ami nia komunidade, atu labele hanesan ita nia viziñu ida nia uma fatuk, hafoin ita nian iha sorin kios kiik-oan ida maibé ita hakarak selu hanesan hotu viziñu. Ida ne’e ladun di’ak no ita tenke ko’alia buat sira ne’e ho klaru”, nia haktuir.

Fernando Sousa esplika, parte autoridade munisípiu iha devér atu hato’o preokupasaun hosi komunidade afetadu ba nasionál tanba sira nia parte rasik labele foti desizaun.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here