Parlamentu Joven hala'o enkontru ho Prezidente Komisaun C, Fernanda Lay no Sekretária Meza Parlamentu Nasionál, Terezinha Maria Maria Viegas, iha sala Konferénsia, sesta (11/10). Imajen/Evaristo Soares Martins

DILI, 05 dezembru 2019 (TATOLI)—Prezidente Komisaun C (Finansa Públika) iha Parlamentu Nasionál, Maria Fernanda Lay, hateten asesór fó asesoria de’it, maibé deside proposta orsamentu jerál Estadu (OJE) iha polítiku sira-nia liman.

Prezidente Komisaun C ko’alia kestaun ne’e relasiona ho Primeiru-Ministru, Taur Matan Ruak, fó-sala asesór sira tanba prepara proposta orsamentu 2020 iha indísiu inkonstitusionál no la estruturadu.

Fernanda haklaken katak nia respeita hanoin husi Primeiru-Ministru nian, maibé la’ós Parlamentu Nasionál de’it mak asesór sira apoia, maibé Governu mós iha.

“Klaru katak asesór bele fó nia análize tékniku maibé se mak deside, polítiku sira mak deside. Ha’u bele simu krítika hosi señor Primeiru-Ministru. Realidade lubuk ida mak ami hasai no husu halo análize iha finansa, artigu sira ne’ebé iha, sira halo no ami hato’o. Ami sente katak ami hato’o ne’e la’ós asesór sira mak fó asesoria sala. Ami tenke fundamenta no ami hatudu razaun ne’ebé ami la konkorda iha artigu sira”, nia dehan iha resintu Parlamentu Nasionál, kinta ne’e.

Deputada CNRT ne’e argumenta, proposta orsamentu ne’ebé aprezenta hosi Governu, programa sira la han-malu ho tabela orsamentu.

Nia fó ezemplu, ida mak artigu 2 kompara ho artigu 5 hosi proposta Lei OJE 2020. Iha artigu 2 dehan aprova programa sira, maibé tabela ne’e la tama iha artigu 5.

Nia hatutan, Unidade Planeamentu Monitorizasaun no Avaliasaun (UPMA) halo serbisu di’ak maibé planu halo orsamentu ne’e seidauk integra didi’ak.

“Pareser hosi Komisaun balun informa ministru no sekretáriu Estadu balun, bainhira deputadu sira husu sira la hatene. Sira dehan fali UPMA mak tau iha ne’ebá. Ami hakfodak, até balun dehan ‘salah posting’. Ha’u la hatene tanba sira mak halo orsamentu”, Fernanda  haktuir.

Prezidente Komisaun C ne’e husu ministériu no sekretaria Estadu sira atu integra didi’ak planu orsamentu 2020 ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here