Eis Primeiru-Ministru, Kay Rala Xanana Gusmão, tuir julgamentu ba kazu sosa Karreta prado ba Parlamento Nasional. Imajen/ Egas Cristovão

DILI, 05 dezembru 2019 (TATOLI) – Lider karizmátiku, José Alexandre Kayrala Xanana Gusmão, perante audiénsia julgamentu iha Tribunal Distritál Dili, ohin, deklara no rekoñese katak, nia mak orienta ba Parlamentu Nasional liuhosi prezidente PN, Saudozu Fernando Lasama de Araújo, atu sosa karreta prado ba deputadu sira iha tinan 2008.

Notísia Relevante : Ohin, Xanana Sai Sasin Ba Kazu Kareta Prado

Juiz Tribunál Distritál Dili hamutuk Eis Primeiru-Ministru, Kayrala Xanana Gusmão iha audensia julgamentu ba kazu sosa Karreta prado ba Parlamentu Nasional. Imajen/ Egas Cristovão

Altura ne’ebá Xanana hanesan Primeiru-Ministru autoriza no orienta sosa karreta prado ba membru PN, tuir Xanana, tanba  situasaun urjente hanesan atentadu ba eis Primeiru-Ministru José Ramos Horta no nia rasik.

“Ha’u hanoin realidade kondisaun ba deputadu liuliu karreta la’ós fasil liuliu iha tinan 2007 no 2008 hanesan atentadu ba Ramos Horta no ha’u rasik, inklui mós Parlamentu Nasional momentu ne’ebá  la iha karreta, nune’e mak ha’u deside no asina hodi sosa karreta ba deputadu sira iha tempu ne’ebá,” afirma Xanana Gusmão iha audiénsia julgamentu.

Kona-ba preparasaun prosesu hotu hodi sosa karreta, Xanana tenik, Governu liuhosi Ministériu Finansas ho Parlamentu mak prepara atu hola karreta ba deputadu sira hodi hala’o servisu, maibé kona-ba asinatura no foti desizaun Xanana rekoñese hotu hodi dehan, nia mak asina no orienta.

Hatán ba Tribunal kona-ba alterasaun karreta prado ba mitsubishi, Xanana mós rekoñese katak momentu ne’ebá nia parte simu duni karta ida hosi Saudozu Fernando Lasama nu’udar Prezidente Parlamentu Nasional.

Iha biban hanesan, testemuña ho inisiál MXM informa kona-ba sosa karreta prado inisiativa hosi Prezidente Parlamentu Nasional, matebian Fernando Lasama tanba momentu ne’ebá deputadu nain rua mak sa’e motor no ida seluk sa’e mikrolete no konsidera situasaun emerjénsia.
Nia dehan, momentu ne’ebá PPN Saudozu Lasama sente aan katak koitadu “Ha’u sa’e karreta di’ak, maibé ha’u nia deputadu sira balun sa’e motor no karreta mikrolete

Kona-ba buat seluk, testemuña ne’e deklara hodi dehan, nia parte la hatene no la iha koñesimentu.

Audiénsia julgamentu ne’ebé prezide hosi Juis, Afonso Carmona, Antonio Fonseca, Evangelino Bello, adia fali ba iha loron 19 dezembru 2019, tuku 14: 30 Otl iha TDD.

Iha audiénsia julgamentu ne’e Ministériu Públiku reprezenta prokuradór, Jacinto Babo, arguido sira hetan asisténsia hosi advogadu privadu, Elizabeth Pereira, Jose Pedro Camões, ho Jose Guterres.

Jornalista : Domingos Piedade Freitas

Editór       : Francisco Simões

 

1 KOMENTÁRIU

Leave a Reply to Alan Cancel reply

Please enter your comment!
Please enter your name here