Xefe Servisu Investigasaun Kriminál Polísia Nasionál Timor-Leste (PNTL) Munisípiu Manatuto, Ivo Magno. Imajen Tatoli/Joanico de Araújo

MANATUTO, 05 dezembru 2019 (TATOLI) – Xefe Servisu Investigasaun Kriminál Polísia Nasionál Timor-Leste (PNTL) Munísipiu Manatuto, Ivo Magno, informa hahú hosi janeiru to’o dezembru 2019 sira nia parte rejistu kazu krime hamutuk 76.

“Totál kazu aas liu mak asaltu hamutuk iha 27, ne’ebé mak involve joven sira no dala ruma baku malu no ataka malu, tuir mai mak kazu violénsia iha 23 kazu, ameasa iha 13, asaltu seksuál liuliu ba labarik minoridade sira iha kazu 8, suisidu 1, furtu 2, omisídiu 1 no inséndiu ida iha Laclo.

Nia dehan, Munisípiu Manatuto uza ona sistema sentralizadu ne’ebé normalmente semana ida eskuadra sira relata ba PNTL Manatuto, ba kazu ne’ebé akontese iha segunda to’o sesta.

“Iha sesta dader, purvolta tuku 9 sira tenke relata informasaun ba PNTL Munisípiu Manatuto hodi ami bele kanaliza fali ba Komandu”, tenik ba Agência Tatoli iha nia kna’ar fatin, kinta ne’e.

Ivo Magno subliña, iha fulan ida nia laran PNTL Munisípiu Manatuto bele fornese informasaun iha kada semana ka kada fulan ba Komandu no informasaun sira ne’e akumula hotu hosi janeiru to’o dezembru, no submete ona iha Ministériu Públiku.

“Ami rejista iha ami ninia Integrated Management System (IMS) ne’ebé akumula kazu hotu, ne’ebé rejistu iha nível nasionál no bele atualiza iha ami ninia sistema. Sistema ne’e integradu ho sistema nasionál hosi Ministériu Públiku.

Nia hatutan: “Kuandu rejistu iha ne’e signifika kazu ne’e prontu ona atu haruka ba Ministériu Públiku, entaun ami nia dadus ho Ministériu Públiku hanesan. Ho ida ne’e mak ami komesa ba fali iha nível nasionál nian iha Komandu Jerál”.

 Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here