Sekretáriu Estadu Komunikasaun Sosiál, Merício Juvinal dos Reis 'Akara'. Imajen Tatoli/António Gonçalves

DILI, 05 dezembru 2019 (TATOLI) – Hafoin deside retira Proposta Lei Orsamentu Jerál Estadu (OJE) 2020 iha diskusaun jeneralidade, Primeiru-Ministru (PM), Taur Matan Ruak, fó orientasaun ba membru governu sira labele halo viajen estranjeiru durante ajustamentu ba orsamentu la’o hela.

“Desde horisehik servisu hotu tenke la’o, Primeiru-Ministru orienta membru governu sira labele ba rai-li’ur, tenke iha Dili para bainhira presiza bele bolu, nune’e fokus ba revizaun orsamentu ne’e”, tenik Sekretáriu Estadu Komunikasaun Sosiál, Merício Juvinal dos Reis ‘Akara’ ba jornalista sira hafoin atualiza serbisu Governu nian iha reuniaun líder bankada, iha sala konferénsia Parlamentu Nasionál (PN), kinta ne’e.

Nia hatutan, membru governu sira labele ba rai-li’ur tanba ekipa revizaun presiza sei kontaktu hodi haree ba proposta kada ministériu ida-idak nian.

“Membru Governu iha rai-laran kuandu ekipa bolu, hanesan parte komunikasaun sei atualiza nafatin serbisu mai Parlamentu Nasionál”, dehan nia.

Tanba ne’e, dezde horisehik Xefe Governu forma ona ekipa hodi halo revizaun, ne’ebé lidera hosi Ministru Estadu Prezidénsia Konsellu Ministru, Hermenegildo Augusto Cabral Pereira, Ministra Finansa Interina, Sara Lobo, Ministra Edukasaun, Juventude no Desportu, Dulce de Jesus no Ministru Transporte no Telekomunikasaun, José Agostinho da Silva.

“Sira na’in-haat maka sei lidera revizaun ne’e, ita servisu tuir loron ne’ebé Primeiru-Ministru deklara katak loron 13 dezembru sei lori fali orsamentu ba Plenária Parlamentu. Ohin ha’u informa ba deputadu sira katak sei iha prosesu revizaun mak ekipa presiza tempu tan karik, parte Governu sei informa mai fali Parlamentu”, Akara realsa.

Governante ne’e informa, daudaun ne’e ekipa hahú halo ona serbisu bazeia ba rekomendasaun Komisaun C (Finansa Públika), ne’ebé husu orsamentu tenke estruturadu no tau iha verba loloos.

Merício rasik seidauk bele fó sai montante orsamentu hafoin halo redusaun tuir rekomendasaun deputadu sira, tanba oras ne’e ekipa revizaun sei halo hela serbisu.

“Bazeia de’it deklarasaun Primeiru-Ministru, katak loron 13 dezembru ne’e seidauk iha mudansa, maibé kuandu iha prosesu laran mak ekipa husu tan tempu, Primeiru-Ministru sei fó sai loron aprezentasaun foun”, nia salienta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here