Primeiru-Ministru, Taur Matan Ruak. Imajen Tatoli/António Gonçalves

DILI, 05 dezembru 2019 (TATOLI) – Primeiru-Ministru (PM), Taur Matan Ruak, fó ona orientasaun ba Komisaun Revizaun Orsamentu Jerál Estadu (OJE) 2020, atu ko’a orsamentu tuir kapasidade ezekusaun.

Kestaun ne’e, Xefe Governu aprezenta ona ba Prezidente Repúblika (PR), Francisco Guterres Lú Olo, iha Palásiu Prezidensiál, Bairro Pité.

“Ha’u fó ona orientasaun ba komisaun ne’ebé halo revizaun ba orsamentu atu ko’a osan tuir kapasidade ezekusaun. Alokasaun orsamentu sei bazeia ba kapasidade ezekusaun instituisaun estadu ninian”, tenik PM Taur, kinta ne’e

Nia haktuir, durante enkontru, informa ba Xefe Estadu katak sei prepara Proposta Orsamentu foun iha tempu badak nia laran hodi aprezenta fila-fali iha Parlamentu Nasionál (PN).

“Komisaun Interminesteriál ne’ebé atu halo revizaun ba Orsamentu Jerál Estadu, kompostu husi ministériu haat no lidera husi Ministru Estadu Prezidénsia Konsellu Ministru, Agio Pereira”, nia realsa.

Iha oportunidade enkontru ne’e, PM Taur esplika ba Xefe Estadu Kona-ba razaun Governu retira Proposta OJE 2020 hosi PN.

Nia hateten katak, Governu iha senáriu rua atu hili, foti fali (retira) orsamentu ka obriga PN atu vota kontra.

PM admite, momentu aprezentasaun orsamentu mak Governu obriga PN atu vota kontra, signifika tinan oin Estadu sei funsiona ho duadésimu, Governu monu no rearanju ambiente polítika iha Parlamentu, ho razaun ne’e mak Governu hili atu retira Proposta OJE 2020 iha diskusaun jeneralidade.

“Durante sai Prezidente Repúblika, ha’u sempre apela atu utiliza osan ho prudente, maibé buat ne’ebé ko’alia bainhira asume kargu nu’udar Xefe Estadu no saida mak halo nu’udar Primeiru Ministru la hanesan. Prezidente Repúblika atuál sempre apela atu uza osan ho kuidadu, maibé bainhira Parlamentu no Governu seidauk iha konsiénsia atu halo esforsu prudénsia ba gastu sira ho kuidadu, mak sei labele halo mudansa”, Taur fó hanoin.

Eis Prezidente Repúblika ne’e mós rekoñese katak, desizaun polítika ne’ebé foti atu ko’a Proposta OJE sei fó impaktu ba dezenvolvimentu ne’ebé sei hala’o ho lalais ka neineik.

Nune’e, PM Taur prefere atu la’o ho neineik tanba ida-ne’e sai mós nu’udar responsabilidade PN nian ne’ebé iha relasaun ho jestaun ba espetativa povu nian.

Taur esplika liu tan katak, durante loron-rua, Governu aprezenta Proposta OJE iha PN no hetan opozisaun husi Aliansa Maioria Parlamentár (AMP), nu’udar partidu ne’ebé fó apoiu hodi forma VIII Governu Konstitusionál, hodi husu atu hatun montante orsamentu tanba konsidera inkonstitusionál.

Bazeia ba desizaun husi deputadu ne’ebé forma AMP inklui opozisaun sira, husu Governu hatun montante orsamentu, nune’e PM deside atu retira no hadi’ak fila-fali molok aprezenta ba Parlamentu ba daruak.

PR Lú Olo konsidera iniasiativa no situasaun ne’e di’ak, tanba parte ida atu haforsa liutan kontrolu ba Governu.

Biban ne’e, PM Taur mós konvida PR atu partisipa iha seremónia haloot mate restu saudozu sira iha loron 7 dezembru, iha Jardim dos Herois da Pátria, Metinaro.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here