Sekretáriu Estadu Komunikasaun Sosiál (SEKOMS), Merício Juvenal dos Reis Akara. Imajen Antonio Goncalves

DILI, 05 dezembru 2019 (TATOLI) – Governu liuhosi Sekretáriu Estadu Komunikasaun Sosiál (SEKOMS), Merício Juvenal dos Reis Akara, hatete pozisaun governu hodi rona deputadu sira iha Parlamentu Nasionál (PN), retira proposta lei Orsamentu Jerál Estadu (OJE) 2020, parte ida atu hametin Estadu de direitu demokrátiku.

Liuhosi komunikadu ne’ebé Tatoli simu, ohin, Akara hatutan saida mak deputadu sira preokupa razoavel, relasiona ho montante OJE 2020, billiaun 1,950.

“Konsidera katak Estadu direitu de demokrátiku, ema hotu iha obrigasaun hametin demokrasia, nune’e preokupasaun hosi deputadu sira reprezenta ona públiku em jerál”, katak tan iha nota komunikadu.

Tanba ne’e, nia afirma, Primeiru-Ministru, Taur Matan Ruak, kompromete ona atu aprezenta fali proposta ne’e iha tempu badak, hodi konsidera hanoin hotu hosi bankada parlamentár sira ba interese Nasaun, hanesan mós interese governu-nian.

Nia hatutan Xefe Governu nia hanoin katak ambiente polítika ne’ebé akontese iha uma fukun foin lalais ne’e nu’udar lisaun boot ida iha prosesu hametin Estadu de direitu demokrátiku.

Hosi nota komunikadu ne’e, Merício akresenta objetivu governu hosi OJE 2020 atu hatán ba nesesidade povu no Nasaun, ne’ebé deputadu sira aprezenta kada semana durante plenária.

Ho razaun sira ne’e, OJE 2020 sei investe iha área saúde, ekonomia, edukasaun, finansa públika, infrastrutura, reforsa justisa, demokrasia no direitu ema-nian.

Forma sira ne’e, Akara konklui iha komunikadu ne’e katak governu espera proposta foun ne’ebé sei aprezenta bele hatán ba nesesidade no preokupasaun sira hotu iha Nasaun ne’e. (ki)

Governu Kompromete Submete Fali Proposta OJE 2020 Ba PN Iha 13 Dezembru

Governu Deside Redús OJE 2020 Iha Kategoria Bens No Servisu

HAKEREK NO HATÁN

Please enter your comment!
Please enter your name here