DILI, 05 dezembru 2019 (TATOLI)– Sekretáriu Estadu Protesaun Sivíl (SEPS) liuhosi Diresaun Nasionál Prevensaun Konflitu Komunidade (DNPKK) fasilita formasaun kona-ba prevensaun no rezolusaun konflitu, direitu umanus no jéneru báziku ba funsionáriu hosi Munisípiu 12 inklui Rejiaun Administrativu Espesiál Oe-Cusse Ambeno (RAEOA).
Notísia Relevante : DNPKK Tenke Neutru Sai Mediadór ba Konflitu
Diretór DNPKK, António Viegas, hateten, formasaun ne’e atu reforsa rekursu ka funsionáriu ne’ebé mak destakadu iha munisípiu, nune’e sira bele hala’o knaar hanesan halo mediasaun, prevensaun konflitu no mós pás no seguransa.
Ba jornalista Ajénsia TATOLI iha salaun Ministériu Interior, ohin, Diretór António Viegas, hateten, maske durasaun tempu formasaun loron haat (4) de’it, maibé sufisiente ba sira no bele ajuda sira hodi kolabora ho ekipa munisípiu atu hala’o papél prevensaun konflitu.
Notísia Relevante : Mediadór DNPKK 39 Tenke Ativa Sosializa Dame iha Povu
Funsionáriu Interiór Diresaun Nasionál Prevensaun Konflitu Komunidade hosi Munisípiu Viqueque, Manuel da Costa, hateten, formasaun ne’e bele aumenta sira nia koñesimentu oinsá mak rezolve disputa sira iha baze no kontribui ba prevensaun konflitu.
Formandu mós husu ba DNPKK atu kontinua fó formasaun tanba loron haat ne’e seidauk sufisiente ba sira.
Jornalista : Osória Marques
Editór : Francisco Simões
