DILI, 04 dezembru 2019 (TATOLI) – Senadu Universidade da Paz (UNPAZ) foti desizaun hodi suspende estudante finalista feto na’in tolu husi Fakuldade Saúde Públika tanba halo asaun mal edukadu hodi hamonu krediblidade instituisaun nian.

“Ita foti desizaun ida rigoroza hasoru estudante na’in tolu ne’e tanba hatun ona imajen universidade nian, imajen família nian no mós sira-nia dignidade rasik tanba ne’e mak ita tenke hapara sira hodi labele partisipa iha graduasaun ba tinan ida ne’e. Maibé, sira sei hetan oportunidade ba tinan oin,” hateten Reitór UNPAZ Adolmando Soares Amaral ba Ajénsia TATOLI, iha Kampus UNPAZ, ohin.

Magnífiku Reitór UNPAZ Adolmando Soares Amaral afirma, estudante finalista feto na’in tolu husi Fakuldade Saúde Públiku tenke hakribi hahalok ne’ebé sira halo ona depois mak foin bele hetan oportunidade ba segunda faze.

Nia dehan desizaun ne’e nu´udar alternativu ida atu ema hotu bele obdese. Despaxu universidade nian prontu hotu ona hein de’it senadu universidade sira mai hotu depois asina hodi entrega hikas sira na’in tolu ba família.

“Ita tolera hodi uza nafatin fuan, entaun filozofia ida reforma iha kualidade ne’e sei la atinji. Entaun husi sala sira hanesan ne’e tenke reforma kedan,” nia salienta.

Prosesu administrasaun ba graduasaun nian, tuir Reitór Adolmando katak dokumentu graduadu na’in tolu nian ne’ebé hatama ona ba Ministériu Ensinu Superiór Siénsia no Kultura (MESSK), universidade dada hikas ona no sei aneksu ho osan dolár 200 ne’ebé sira hatama ona ba graduassun sei entrega hotu ba família.

Notísia relevante:Graduasaun UNPAZ Sei “Ala Eropa”

Jornalista : Tomé Amado

Editór      : Rafy Belo

1 KOMENTÁRIU

HAKEREK NO HATÁN

Please enter your comment!
Please enter your name here