DILI, 04 dezembru 2019 (TATOLI)-Kompañia Telekomunikasaun Indonézia TELKOMSEL iha Timor-Leste bandu ninia traballadór sira atu konsumu droga bainhira sei iha hela kontratu servisu ho instituisaun rerefe.
Xefe Ezekutivu Kompañia TELKOMSEL Timor-Leste, Yogi Rizkian Bahar, informa asuntu ne’e, bainhira konvida Polisia Nasionál Timor-Leste (PNTL) liuhosi Servisu Investigasaun Kriminál Nasionál (SIKN)hodi sensibiliza informasaun ba traballadór sira koba-ba impaktu no efeitu negativu ba konsumu ai-moruk droga.
Kompañia ne’e sei demite traballadór sira bainhira identifikadu konsumu droga tanba afeita ba imajen instituisaun.
“Ami konvida Polisia mai atu sensibiliza impaktu konsumu ai-moruk droga, ita hakarak sensibiliza ba ita-nia traballadór sira katak, ai-moruk droga perigu,” dehan, Yogi ba jornalista iha salaun Terra Santa Raikotu Dili, ohin.
Xefe Ezekutivu ne’e dehan, sensibilizasaun hosi SIKN nian ne’e parte ida atu halo preparasaun ba prosesu rekrutamentu ba traballadór foun iha tempu badak.
“Ami sei rekruta traballadór foun, sei teste psíkolojia nomós urine, entaun ami sei la tolera bainhira ita-nia traballadór maka deteta konsumu droga ami sei demite,” tenik Yogi.
Kompañia estranjeru ne’e husu ba polisia atu kontinua hala’o sensibiliza informasaun ba Timor-oan sira atu evita aan husi droga.
Entretantu, Traballadór TELKOMSEL kuaze ema 300-resin hosi munisípiu no nasionál maka partisipa iha atividade sensibilizasaun ne’e.
Ema Na’in 67 Komete Kazu Droga
Iha fatin hanesan, Xefe Servisu Investigasaun Kriminál Nasionál (SIKN), Superintendente Xefe Polisia, Henrique da Costa, hateten sensibilizasaun informasaun ne’e, importante ba joven Timor-oan atu labele konsumu droga.
Tuir relatóriu SIKN durante tinan 2015-2019 konsege prende ona ema na’in 67 tanba konsumu no faan ai-moruk droga. Hosi númeru ne’e, kazu 31 komete husi Timor-oan maiória joven sira, Austrálianu na’in ida no Indonézia na’in 35.
“Durante tinan lima nia laran ita rejista kazu 67. Timor-Leste nasaun ki’ik, ema oituan la tolera nasaun ne’e atu sai fali fatin tránzitu ba droga,”katak Xefe SIKN.
Nia tenik tan katak, durante ne’e, ema konsidera Timor-Leste sai fatin tránzitu ba droga tanba ne’e, governu persiza reforsa kooperasaun no kordenasaun servisu ho Indonézia ho Austrália hodi kombate droga.
Xefe Servisu Investigasaun Kriminál Nasionál ne’e apresia ho kontribuisaun maihosi Kompañia TELKOMSEL durante ne’e ba deteta kazu Cybercrime iha Timor-Leste.
Importante Investe ba Área Prioridade Haat
Entretantu, Membru Ajente Xefe Polisia Servisu Investigasaun Kriminál Nasionál (SIKN) Gastão Piedade, hateten atu kombate droga iha rai-laran, governu persiza investe iha ekipamentu komunikasaun, fundu kombate krime, rekursu umanu no ekipamentu serbisu.
“Ami hanesan ezekudór, ami haree lakunas ne’ebé maka iha, ami kontinua propoin, mais foti desizaun ba ida ne’e depende ba ita nia lideransa sira,” nia hatete.
Nia dehan probelma laboratóriu sai preokupasaun SIKN nian hodi halo teste ba ai-moruk droga tanba ne’e bainhira prende ai-moruk ne’ebé deskonfia droga tenke haruka ba Badan Narkotika Nasional (BNN) Indonézia ho Northern Territory Police of Australia (NTP) hodi halo teste.
PNTL liuhosi SIKN, durante ne’e identifika ai-moruk droga ho tipu oin-tolu maka tama iha Timor-Leste hanesan marijuana, estasi no sabu-sabu..
Entretantu, Tuir Lei Timor-Leste nian bandu ai-moruk droga ho tipu hamutuk 30 hanesan ganja, eroina, kokaina, crack cocaine, kodein, opium, barbiturat, metadon, flakka, tembakaun gorila, tabs, hashish, mescaline, sabu-sabu, ekstasi,sedafit,hipnotik,nipam, angel dust, speed,demerol,lexotan,alkoho;,nokotin, kafein,ketamine, dxm,calmlet, valium no xanax.
Jornalista: Eugénio Pereira
Editór:Francisco Simões
